“Masipauliulian Manomu Haroro ni Tuhan” (1 Tessalonik 5: 1-11) (Ginurithon ni Pdt. Dr. Robinson Butarbutar, Ephorus HKBP)
Hamu angka Dongan hinaholongan.,
Mansai uli hata ni Debata na mamanghulingi hita di Minggunta sadarion, minggu pa-XXIII-hon dung Trinitatis, ai diurupi hataNa hita mandalanhon parsaoran ni angka na porsea di Tuhanta Jesus naung pinaluaNa di pardalanan manomunomu haroro ni Tuhanta Jesus napaduahalihon marhite na “masipauliulion sama hita.”
HataNa tu hita asa masipauliulian sama hita parjolo sahali digurithon apostel Paulus tu sada punguan siihuthon Jesus, ima na marsaor di huria na di kota Tessalonik, propinsi Romawi di taon 50-an na hadirionnasida songon on:
(i) “Naung manadingkon angka ajiajian, na so mangolu, laho mangoloi Debata na mangolu dohot na sintong (1 Tes 1: 9),
(ii) “Naung meret sian haholomon tu hatiuron (1 Tes 5: 5), jala
(iii) “Naung tarbarita tu sandok naporsea di Jesus Kristus di taon 50-an abad parjolo songon angka na marulaon na sian haporseaonna (Gorik: ergou tes pisteos), na marhalojaon na sian holong ni roha (Gorik: kopou tes agapes) dohot na marhabengeton na sian panghirimon (Gorik: hupomones tes elpidos) di Tuhan Jesus Kristus di jolo ni Ama i (1 Tes 1: 3).”
(iv) “Naung dipangido asa badia nasida di ngolu siganup ari, tarlumobi di pardongansaripeon, di pandaraman ndang masiangatan, baliksa patupa holong, ganup mangaradoti na di ibana, mangula marhite tangannasida huhut maradat tu angka na di balian dope” (1 Tes 4: 3-12).
Songon i angka na porsea na parjolo na di kota Tessalonik i nang pe:
(i) “Maimaima dope nasida di haroro ni Jesus Kristus napaduahalihon (1 Tes 1: 10);
(ii) “Ndang munggil alai hot dope haporseaonnasida nang pe diadopi nasia do na bernit (Gorik: epatete, = manaon na hansit/hansitan) dohot haporsuhon (Gorik: thlifseos) sian angka dongannasida sabangso di kota Tessalonik, songon halak Kristen di Judea na pinaporsukporsuk (Gorik: sumphuleton) ni halak Jahudi na so porsea di Jesus (1 Tes 2: 14’ 1 Tes 3: 3-5), baliksa tarbahennasida dope manongos pangurupion tu apostel i tu ulaonna marbarita nauli (1 Tes 3: 6).”
Asa, ndang tu na so malua dope, alai nunga dipalua, ndang tu anak haholomon be alai anak hatiuron, ndang tu na so mangulahon haporseonna, alai na mangulahonsa do, jala tu na marusaha di holong ni rohana, tu na manghabengethon panghirimonna di haluaon, dohot na marhaposeaon na so munggil uju mangadopi na bernit dohot na porsuk siala siihuthon Jesus nasida.
Siala ni i, jala nang pe songon i, asa hot songon i, dipangido apostel Paulus ma nasida asa lam patogu haporseaonnasida di Tuhan Jesus di na manomunomu haroro ni Jesus i. Songon dia ma asa tardungdung i? I ma marhite dua na mangihut on:
Naparjolo, masipaingotan di bagasan pangantusion masiapulan. I do hinangkam ni hata Gorik na dipangke tu hata masipaingotan i, i parakaleite allelous. Kata kerja “parakaleite” marharoroan sian kata dasar “parakaleo”, marlapatan ndang holan mangapoi, alai sahat tu na mangapuli.
On ma hata na diharingkothon ni na mangadopi na bernit, na marungkil ala ni parungkilon, thlifsis, niadopannasida sian na manghasogohonnasida sian dongan sahuta/sian humaliangnasida. Masiapulan sama nasida uju masa na songon i, unang padokdokhu adopan ni marsasahalak. Mansai ringkot masiapulan. Asa, ndang holan Tondi Porbadia i sambing na mangapuli, alai dohot do sama na porsea na tong marungkil.
Napaduahon, masipauliulian (Gorik: oikodomeite allelous = na marlapatan saling membangun) di parngoluan siganup ari. Hata oikodomeite marharoroan sian kata kerja “oikodomeo”, na marlapatan membangun, pauliulihon. Masipauliulian sama nasida.
Napaduahon i do na gabe topik ni jamitanta, i ma na mangondolhon ndang holan masiapulan uju masa parungkilon (parakeleite), alai sahat do tu na patupa nasa sipatupaon anggiat boi ngolu ni dongan di ngolu siganup ari terbangun, tarpauliuli.
Di Padan Naimbaru hata kerja on dipangke laho manosoi ulaon pauliulil/membangun na mangihut on: pagodanggkoon/pauliulihon/membangun pertumbuhan di habisuhon Kristen, panghilalan holong, asi ni roha, hadaulaton, habadiaoon, hatarpasupasuon (English: wisdom, affection, grace, virtue, holiness dohot blessednes). Asa, beha ma asa ruas ni punguan ni huria i masipauliulian di onomsa: habisuhon, holong, asi ni roha, hadaulaton, habadiaon dohot hatarpasupasuon. Asa ganup patupa ulaon pauliuli i.
Hata i dipasahat tu hita sude ruas ni HKBP di tingkinta nuaeng, i ma tu hita naung pinatigor ni Debata di bagasan Jesus Kristus, naung mangulahon na pinatupa ni parTessalonik i, na marsaor di bagasan HKBP.
(i) Di tongatonga ni parsaoranta di jabu songon huria na ummetmet, ingkon masipauliulian do sama ruas ni HKBP di bagasnasida. Unang ma holan na sada, isara Ina, na pauliulihon/membangun na sadanari, Ama i, alai ingkon masipauliulian do, saurdot tu hatauon ni keluarga i.
(ii) Alai sama ruas ni huria ni HKBP na marsaor di sada sektor pe, ingkon masipuliulian do, saling membangun asa ganup ruas ni huria di sektor/lungguk i taruli sian sude, jala mambahen na uli tong tu sude ruas ni sektor i.
(iii) Di tongatonga ni Pospel manang huria marsadasada pe, masipauliulian ma, unang holan sada sektor na taruli/terbangun, alai ingkon sude sektor masipauliulian sama sektor.
(iv) Di tongatonga ni angka distrik ni HKBP di sandok HKBP pe ingkon masipauliulian do. Tapuji ma Tuhanta ala nuaeng nunga tapadalan i marhite na tapatupa mamungka 1 Januari 2023 i ulaon Sentralisasi Parhepengon, dalanta laho masipauliulian di sandok HKBP marhite na sude hita mambalanjoi angka partohonan gok tingki, jala manuhuk na ringkot tu biaya operasional dohot biaya program ni resort, distrik nang hatopan. Ndang be songon na tapatupa andorang so i, holan sama na di huria i do masipauliulian, na asing di sandok HKBP ndang dipatupa/ndang diula, ndang masipauliulian.
Gabe adong na mansai taruli, alai na asing gumodangan ndang taruli di pansagihonan ni partohonan gok tingki dohot na ringkot di ulaon pahehe huria di angka huria na so marruas na tau parhepengonna.
Ingkon ganup na dipauliuli. Unang holan sada na paulihon na asing, alai masipaulian do, ndang holan pauliulihon dirina sandiri, alai di bagasan sada parsaoran na sada hita masipauliulian marhite Sentralisasi Parhepengon i, anggiat boi sandok HKBP di ganup inganan dipauliuli sandok HKBP. Ndang holan HKBP di sada inganan na dipauliuli, alai sude HKBP masipaulian.
(v) Ulaon masipauliulian/saling membangun na songon i do tong na taboan haruar sian HKBP tu parngoluonta songon sada bangso di sandok Indonesia on. Na so boi maju bangsonta molo ndang adong partondion na songon i sama anak-anak bangsa Indonesia. Ndang denggan tu hamamaju ni bangsonta molo holan na di Jawa sama na di Jawa do na masipauliulian, na asing di sandok Indonesia on dipasompu mandungdung sintasintana, manaon, ala ndang tuk. Gabe holan di Jawa ma pembangunan, di angka pulo na asing na marribu i ndang adong dipauli angka na di Jawa.
Ndang boi maju sandok Indonesia, molo telpang do ulaon paulihon, membangun i. Siala ni i do umbahen na di ulaon pembangunan ni bangsonta pinatupa ni pamarenta rap dohot na so pamarentanta dipatupa ulaon sian topitopi, dari pinggiran ni Indonesia, asa boi masipauliulian. Siala ni i nang masa haleon ekonomi di portibion di taontaon uju jala dung masa pandemi Covid-19, boi do bangsonta Indoensia ndang apala madabu tu krisis ekonomi, alai boi do martahan di pertumbuhan 5%.
Songon i do nabaruon di Jerman dung marongrong Tembok Berlin di taon 1989. Tartading do Jerman TImur panghorhon ni parhuasoon ni Komunisme disi. Bahat situtu angka kota dohot huta na metmet disi na marpogos, ndang tolap membangun. Dung sada muse Jerman, ditotophon bangso i ma na ingkon dohot do Jerman Barat pauliulihono Jerman Timur, marhite na paradehon bahat budget ni negara pangkeon laho pauliulihon Jerman Timur, anggiat boi rap taruli sandok negara i. Marhasil do i, gabe rap dipauliuli sandok Jerman.
(vi) Laos songon i do angka negara-negara di portibion, naung sanga holan sabagian negara di sabagian portibion naung gabe jala leleng gabe bangso na maju, na mardohar, alai na asingna i di portibion ndang dohot dipauliuli, mian di bagasan hapogoson.
Panghorhonna, ndang adong dame di sandok portibion. Ala ni i do gabe dituju punguan ni angka bangso do na ginoaranna Development Goals tu angka bangso na pogos, na di bagasanna diarop angka bangso naung majo rap dohot angka bangso na pogos masipauliulian, asa tubu dame dohot hatigoran.
Dipargogoi Debata ma hita masipauliulian sama hita di tongatonga ni hurianta, nang di tongatonga ni parsaoranta dohot ulaonta di bangso dohot negaranta. Laos i do na ringkot tasoarahon di tongatonga ni bangsonta, songon dalanta manomunomu ari haroro ni Kristus napaduahalihon. Amen.
