 |
| Ginurithon ni Ephorus HKBP, Pdt. Dr. Robinson Butarbutar |
Debata Jahowa Manghalomohon Uhum dohot Hatigoran” (Jesaya 5:1-7)
Hamu angka dongan na hinaholongan.,
Songon huria ruas ni Lutheran World Federation hita HKBP, adong do sada pandohan na sai tongtong taingot taringot tu barita na uli, ima ‘Patik ni Debata dohot Barita Nauli” (English: Law and Gospel, Indonesia: Hukum Taurat dan Injil). Na nidokna songon on: “Molo adong sahalak na mardosa, ingkon pasahaton do tu ibana Patik ni Debata sasintongsintongna, satiurtiurna asa ditanda dosana.
Dung ditanda dosana, tubu jala didok panolsolionna, dipasahat ma barita nauli, ima hasesaan ni dosa sian Debata naung rade di bagasan Jesus Kristus. Naung disesa dosana, ndang ulakhononna be mardosa. Ala na mura madabu tu bagasan dosa do ganup jolma, adong ma nidokna, ‘rade ganup tingki mangongku dosa, asa adong ganup tingki hasesaan ni dosa.”
Hamu angka dongan, siala ni i denggan ma jolo taida formula ‘‘Patik dohot Barita Nauli’’ i andorang so sahat hita tu jamita:
Mangihuthon pangantusion dohot pangalaho na songon i, hata ni Debata na mamangkulingi hita sadarion dibuat sian buku ni panurirang andorang so habuangan, na paboa uhum ni Debata naung marnida dosa ni bangso i, anggiat adong hamubaon, panolsolion ni dosa, ima sian Panurirang Jesaya 5:2, na isina pabotohon holso ni roha ni Debata marnida bangsoNa Juda, na atik pe nunga tung dihaholongi jala dipatureture Debata, songon parporlak anggur mangaradoti porlakna asa marparbue na tonggi - ndang mamperbuehon parbue na tonggi, baliksa na asom.
Lapatanna, muruk Debata Jahowa tu nasida ala ndang na denggan diparbuehon nasida di ngolu nasida siganup ari. Siala ni i naeng uhumon ni Debata ma bangso i. Molo diongku nasida dosanasida, mulak ma rohaNa mida nasida. Ala di pardalanan ni tingki dung i ndang adong hamubaon ni roha i, ndang adong panopotion ni dosa, di ujungna diuhum Debata ma nasida tu habuangan. Alai, dung mardalan panguhumon i tong do di ujungna diasii Debata nasida, gabe di boan ma nasida mulak sian habuangan, atik pe ndang mangongku sala dope nasida. Digoari Debata angka dosa nasida holan laho paboahon asi ni rohanasida.
Nueang sahat ma hita tu jamita na marojahan tu Jesaya 5: 1-7 i, ima Patik ni Debata na manghirim hamubaon ni roha asa sahat nang barita nauli, ima asi ni roha ni Debata tu hita molo tabege patikni Debata i jala molo tasolsoli dosanta siala taalo patikNa i.
Hamu angka dongan. Nantoari, 7 Oktober 2023, nunga marumur HKBP 162 taon dung hatutubuna di taon 1861. Parjolo tapangke ma jolo tingki mangalapati hajongjongan ni HKBP di jolo ni Debata dung tubu HKBP. Na mangihut on denggan do goaron, laho mandok tu hita songon na nidokNa tu bangsoNa Juda i, ima nunga dibahen parporlak anggur i, ima Debata, tu porlak anggur i, ima HKBP, songon na binahenna tu Juda:
“Ndang adong na so naung dipatupa Debata tu hita: “Mansai balga do denggan basa ni Debata tu hita HKBP, tu ruas nang partohonan nang parhaladona. Ai nunga gabe bangsoNa hita marhite pandidionta i, na pinarmahanan dohot na pinasupasuNa gabe bangso na pinillit. Jala nunga dipapungu hita ganup tu sada parsaoran ni huria, nunga diparbadia jala dipatongtong huriaNa i. Diramoti do HKBP sian sada partingkianta tu partingkian na asing, jala dipatongtong sahat ro di ari parpudi. Huhut tahe, dipasupasu hita ndang holan di portibion alai dohot do di hangoluan sogot, jala dungkon ni i gabe pasupasu do hita.”
I do umbahen na atik pe metmet do toropta sian bilangan martimbangkon angka houm na asingna i di tongatonga ni bangsonta na sada i, bahat do dibahen Debata hasurunganta di tongatonga ni parngoluonta songon bangso, ima hadirionta na so muraura mandele, baliksa hadirionta na rade mangadapoti angka tantangan na tung balga jala na imbaru situtu. Tarlumobi ma tahe, laho pahinsat panghobasionta di bagasan jala tu duru ni HKBP dumenggan, tumigor, jala lam patuduhon hasadaonta na masiurupan manuhuk na dokdok i mangulahon ulaon ni huria i di parsaoran, mamaritahon barita nauli dohot mangulahon ulaon así ni roha di partingkian nuaeng na digohi parungkilon hajolmaon na tung dokdok adopan panghorhon ni ragam sibonsirina isara parmohop ni portibion, nang angka bencana alam.
Nunga mardalan denggan Sentralisasi Parhepengon ni HKBP saleleng 10 bulan on marojahan tu haputusan ni Sinode Godang HKBP Oktober 2022 na salpu. Nunga 66 persen target naung tardungdung hita di bulan Juli i, sian 80 persen na tasangkapi laho manuhuk sude. Nunga lam hiras jala hinsa angka pangula mangula. Nunga tabonai pa ris angka partohonan tu angka huriahuria na metmet pe tahe, asa dumenggan jala ris panghobasion.
Siala ni i do, songon naung hupangidohon marhite Youtube nantoari di ari 7 Oktober 2023 i, hujouhon do tu hita mangalompit tangan martangiang tu Tuhanta i, manghamauliatehon así ni rohaNa i tu hita nang panjouonta gabe angka naposoNa di huria nang di duru ni huria, songon ima nang pangaramotiona di ganup hita marsadasada nang marsasahuria di ingananta be di na mangulahon panjouoNa i hita.
Jala hujouhon do tu hita asa hot ma hita manghaholongi HKBP naung pinajongjong dohot pinatongtongNa marsundutsundut i.
Alai nuaeng ro ma patik ni Debata tu hita naung hinaholonganna i, asa tabilangbilangi atik na marsak do Debata marnida hita ala mangihuthon panimbangionna ndang dope mamparbuehon parbue na denggan dope hita tu na humaliang hita, tu donganta jolma, di bagasan pardongansaripeonta, parsaoranta dohot na di humaliang dohot di ulaonta be. Sotung, dung tabahen panulingkition di bagasan dirinta sandiri songon huria parsaoran dohot songon huria di diri dohot bagasta be, didok Debata dope tu hita songon na nidokna tu Juda sinajolo i: “Sai dipaimaima uhum, hape ida ma pangarupaon do; hatigoran, hape ida ma anggukangguk do.”
Hamu angka dongan, molo taida hata na dipangke Debata marhite panurirang Jesaya i di hata Heber mansai bagas do. Antar dos do huruf-huruf na dipangke, ale dao imbarna. Songon on do didok Debata taringot tu Juda i: ‘le mish’pat w’hinne mis’pach’ dohot le’tsedeqah w’hinne tseaqah = Sai dipaimaima uhum, hape ida ma pangarupaon do; hatigoran/keadilan, hape ida ma anggukangguk/cry do, tontu ala ditaon ketidakadilan.
Beha do pamilangmilangionta ruas nang partohonan ni HKBP songon huria di sandok HKBP saleleng on songon dalanta manghamauliatehon denggan basa ni Debata?
(i) Suraon do dos dope pamerengon ni Debata tu hita HKBP di diri nang parsaoran hurianta be? Sotung ndang uhum na taula, baliksa pangarupaon tu donganta sahuria, tu donganta partohonan, tu donganta jolma, tu donganta na tinompa na asingna i na didok Konfessi 1996-nta ingkon radotan jala ramotanta? Beha do di bagasta, sotung tapatupa na so uhum tu donganta saripe, tu donganta sajabu, tu ianangkonta, tu natorasta, tu angka lansianta. Sotung tapatupa pangarupaon tu angka kaum diffable? So tung tapatupa na so uhum tu angka na mangula rap dohot hita di angka ulaonta be? Ndang tapatupa uhum tu parompuan di tongatonganta, baliksa pangarupaon. Denggan do tapatupa pangarimangrimangion. Molo i do, tapatupa panolsolion huhut tapangido haseseaan ni dosa sian Tuhanta.
(ii) Suraon do dos dope pamerengon ni Debata tu hita, na dipaimaima Ibana hatigoran/keadilan sian hita, hape na tapatupa ima ketidakadilan na mambahen bahat na di torunta, bahat na tauluhon, bahat na dipasahat tu hita tumatangis tu Debata mangalualuhon hajahatonta maradophon nasida, crying to the Lord. Ndang tapatupa keadilan tu angka kaum diffable, tu parompuan, tu angka na tinompa na asingna i, dohot tu angka na tauluhon nang tu na manguluhon hita di era digital, gabe tumatangis nasida? Molo i do, denggan ma hita mangongku dosanta, dohot mangido hasesaan ni dosa, dung i tabagabagahon na tu Debata hamubaon tu ariari na ro, unang gabe dipasombu hita, hurianta, dibutbut di sada tingki hadirionta songon bangsoNa?
Ala ni i do, di bagasan topik jamitanta ‘Jahowa Debata manghalomohon uhum dohot hatigoran,” denggan do hita ganup:
(i) Umboto lomo ni roha ni Debata i jala marsangkap mangulahonsa di ngolunta di rumang na marragam i, di parsaoran nang di ulaon songon i nang di parsaripeonta, ndang laho patigorhon hita di jolo ni Debata, alai pasaurdothon haluaonta dohot ulaonta nang ngolunta, didok di hita Hakristenon, marhangoluan na badia dalan manghamauliatehon haluaonta;
(ii) Mangarimangi pardalan ni ngolunta, asa molo ndang saurdot dope na tapatupa saleleng on asa marhamubaon, unang pasombuhonsa, marneang ni roha, unang manaon hita sian pangalahonta sandiri dohot sian na dipasombu Debata hita, gabe manaon hita. Dison taingot asi ni roha ni Tuhanta Jesus na manesa dosa ni angka pardosa na manolsoli dosana;
(iii) Patuduhon di ngolu nang diulaonta marhamubaon i marhite angka ulaon na pajongjong uhum dohot patupa hatigoran di pardalan ni ngolu, di ulaon nang di panghataionta be.
Dipargogoi Debata ma hita patupa i. Amen
