 |
Ginurithon ni Ephorus HKBP, Pdt Dr. Robinson Butarbutar |
Hamu angka Dongan sahaporseaon.,
Laho manosoi hita angka naung tardidi tu bagasan goar ni Debata Sitolusada, naung targoar Ruas ni Harajaon ni Debata, angka naung pinatigorNa marhite Jesus Kristus, angka sitean Hangoluan na so ra suda i, jala angka na dijou gabe pasupasu di portibion, angka ruas ni HKBP naung pinarbadiaanNa dohot naung pinatongtongna i, asa unang gabe na porsea na so magodang jala na so marparbuehon parbue na denggan uju di ngoluta na satongkin i di portibion hita, dipillit ma hata umpama na pinatolhas Tuhanta Jesus gabe jamita tu hita. I ma jamita pangajarionNa na marhabisuhon, pangajarion na marumpama, tu natorop nang angka siseanna di topi tao (Mat. 13:31-35, ida Mat. 13:1-2).
PangajarionNa marhite umpama i mansai tangkas impolana. Dia ma i? Ia angka na martondi Harajaon ni Debata ndang jadi so martumbur panghorhon ni ngoluna tu na asing di duru ni dirina uju mangolu di portibion, alai ingkon martumbur, magodang jala marparbue, mampanghorhon si tutu ngoluna di portibion, mampanghorhon na denggan tu na asing, lobi sian na tarrajumon hian.
Diondolhon Tuhanta Jesus i marhite patolhashon dua umpama manguduti pangondolhonna di hinaringkot ni boni na madabu tu tano na denggan, na siala ni i tubu jala martumbur huhut marparbue na balga, adong saratus lompit, adong onom pulu lompit, adong tolu pulu lompit (ay. 23) so ingkon gugaon ni simaremeeme na tubu di tano i (ay. 24-30).
Laho mangondolhon naung pinatolhasNa andorang so turpukta on, i ma na di ayat 23 i, na so jadi taluhonon ni simarememe i (ay 24-30) dipatolhas ma umpama taringot tu boni na ummetmet sian nasa boni ni suansuanan, i ma batu ni siarum, ala dung tubu gabe umbalga sian nasa ingkau rata pola hira hau, jala ro angka pidong na martongatonga ni langit marasar tu rantingna. Jala diuduti ma i marhite na patolhas itak naung niasoman na tuk mangasomi itak tolu ampang. I ma balga ni panghorhon ni na metmet i, boni batu siarum, dohot itak naung niasoman i na mampanghorhon na balga.
Hamu angka dongan, siala ni i do tabahen gabe topik ni jamitanta "Marhaporseaon jala magodang di bagasan Tuhan i." Dos do on tu pangajarion ni Tuhanta Jesus tu angka siseanna na tarsurat di Evangelium Johannes 15: 5 i songon on: "Ahu do hau anggur i, hamu do ranting i. Na mian di bagasan Ahu jala Ahu di bagasan ibana, i ma na mamparbuehon godang, ai ndang tarula hamu agia aha, anggo so mardongan ahu."
Na di Mateus 13 on mandok harajaon ni Debata i martumbur do jala mampanghorhon na denggan tu na asing. Na di Johannes 15 i mampanghorhon di ngolu ni siihuthon Jesus marsasahalak. Padomuonta do duansa, i ma: Angka na di bagasan Tuhanta i di bagasan harajaonNa mamparbuehon parbue na denggan do tu angka na di humaliangna. I do umbahen na disintasintahon HKBP naung tarpasupasu, naung marumur 162 taon ne. Di taon 2064, i ma 50 taon dung tatotophon visi ni HKBP di Sinode Godang taon 2014, asa gabe pasupasu tu portibion HKBP, parhalado nang ruasna.
Mansai bagas do pangajarion ni Tuhanta Jesus i tu hita, taringot tu partumbur ni harajaonNa nang partumbur ni panghorhon ni ngolu ni na mian di bagasan Tuhan i tu hita angka jolma. Martumbur do harajaon ni Debata marhite angka na mian di bagasan ibana di sandok portibion mamungka dung haroro ni Jesus Kristus na manarihon harajaonNa marhite pangajarionNa nang marhite haroroNa, mamungka abad parjolo sahat tu nuaeng on, nang tu tingki na naeng ro.
Ndang dung talu, manang taluhonon ni angka tantangan jaman harajaonNa nang panghorhon ni ngolu ni angka na mian di bagasan Ibana. Isarana, na masa di negara Hongaria. Adong sada uluan ni huria disi na gabe ruas ni Komite Sentral Dewan Gereja-gereja sedunia, na paboahon tu ahu na tar dumenggan do huria ni Kristus di negarana nuaeng on mangadopi tantangan zaman nuaeng on, dumenggan sian di manang piga negara di Eropah Barat, ala uju dibolusnasida partingkian parhurajaon ni Komunisme disi na manindos huria, alai mangolu do huria i, gariada maherbang.
Isi ni pangajarion ni Tuhanta Jesus pe, taringot tu hatigoran, kebebasan, dame dohot holong, martumbur do di portibion, nang pe sian tingki tu tingki sai taida do alo ni angka nilai harajaon ni Debata i sai tong manggulmit gogo. Isara ni hajahaton ni si Adolf Hitler di abad padua puluhon, porang ni binahen ni Presiden ni Russia, Putin, maradophon negara Ukraina nuaeng, songon i ma nang na masa di Timur Tengah nang Afrika dohot na asingna i. Sai adong dope tabege di partingkian digitalisasi on angka na manggadis donganna jolma, adong na sai manegai portibion.
Ala ni i, hamauliatehononta do nuaeng na dipanghulingi Debata hita muse marhite pangajarion umpama ni Jesus Kristus na marhabisuhon i, na sahat tu nuaeng nang tu tingki na ro marhuaso di ginjang ni saluhut, na umboto saluhut, ala marhite i dipodai hita asa marhite hita na tongtong mian di bagasan Jesus Kristus mampanghorhon na denggan ngolunta marsadasada di ngolu on, mamungka sian bagasta be sahat tu na tumimbo mampanghorhon tu negaranta, nang portibion na tongon lam mohop nuaeng on, mambahen lam bahat angka mara diadopi jolma i, angka mara na so dung dope diida hajolmaon di sandok portibion.
Sada do tonaNa, i ma mian ma hita di bagasan Jesus, di bagasan pangajarion harajaon ni Debata pinatolhasna, i ma patupa kebebasan, pajongjong hatigoran, patupa pardamean na marhatigoran, dohot patuduhon holong na mampanghorhon di ngolu on tu angka donganta, boi ma mampanghorhon na denggan ngolunta, lobi sian na tardodo rohanta.
Di ngolunta mamungka tubu sahat tu nuaeng, hita angka dakdanak, remaja, naposo, natoras nang natuatua naung ganjang situtu umurna, boi do ra tagoari angka ngolu niise do naung tatanda na mampanghorhon na denggan ngoluna, pamingkirionna na tarpadalan, ndang pamingkirion na holan nipi, panghorhon ni ngoluna, saurdot tu pardalanan ni ngolunta ganup. Ahu, adong do huboto na mampanghorhon ngoluna tu na humaliang. Natorashu, Bapa, Inong pangintubu br Pardede, Inong panguduti br Simanjuntak, mansai balga do panghorhon ni ngolu nang ulaon nasida tu ngolunami angka ianakkonna (11 halak) atik pe pogos do nasida, partani dohot buruh. Adong do tong Inong Angkathu halak Inggris, na margoar Margery Batterbee, na manangiangkon ahu uju marsiajar ahu di Inggris di tingki na salpu (1987-1990) jala dung i (sahat tu hamomondingna) na manumpahi ulaonku. Adong do tong Amang Udangku na mangurupi ahu uju naeng borhat tu Inggris.
Di na manguluhon HKBP mangadopi angka ulaon na balga, diurupi angka ruas ni HKBP do ahu, isara uju maneleson utang ni HKBP tu Dana Pensiun diurupi Amang Luhut Binsar Panjaitan do HKBP, na mamanghulingi angka donganna, diurupi keluarga ni pomparan ni Raja D.L Sitorus na hinan, diurupi Amang Sukur Nababan dohot bahat na asing songon i nang Amang St. Albert Simanjuntak, Amang St. Marangkup Manik dohot Amang Ir. Elisa Lumbantoruan parade na ringkot asa mardalan Sentralisasi Parhepengon ni HKBP di era digital dung ditotophon Sinode Godang Oktober 2022 mardalan ma Sentraliasi Parhepengon mamungka 1 Januari 2023, gabe mampanghorhon na denggan tu sude pangula na gok nang personel ni HKBP, na mampanghorhon tong di ringgas dohot hinsa ni rohanasida mangula, jala boi HKBP nangetnanget parade partohonan mangula tu angka huria na so dung dope marpartohonan na gok tingki na sai laon.
Pos do rohanta na marhite i lam maherbang ma harajaon ni Debata, bahat na taruli siala ni ulaon ni angka ruas ni HKBP naung dihobasi HKBP di ariari na ro on, tarlumobi di na boi muse HKBP di taon 2045 gabe negara maju.
Molo ginoaran sude naung dipangke Debata patupa duansa na ringkot i, manelesehon utang tu Dana Pensiun, dohot pajongjong Sentralisasi Parhepengon, ndang siat inganan ni jamita on. Marhite on pinuji do Debata marhite nasida. Di parhutaan ni naposo bulung di Jetun Silangit pe songon i nang di Seminarium Sipoholon nang di RS HKBP Balige dohot di angka Sikkola sahat tu Universitas HKBP Nommensen pe bahat do nauli na tongon mangerbang marhite angka ruas nang partohonanta na mangula disi. So dohot dope ginoaran n niula ni angka Department ni HKBP di tolu taon ne i, mamungka Januari 2021 i.
Siala ni i denggan ma angka dongan tong taida dia do angka nauli naung masa di ngolu nang ulaonta be ala mian hita di bagasan Jesus, i ma di bagasan nilai-nilai harajaon ni Debata i. Tagoari be ma i, dalanta mamuji Debata. Molo ndang haru bahat dope taida angka i di ngolunta, denggan ma hita patupa pangarujirujian, dia sialana dohot dia ma na ingkon sipatureonta asa boi taida panghorhon na denggan ni ngolunta siala mian hita di bagasan Tuhan i, di bagasan nilai-nilai ni harajaon ni Debata, songon parbue ni na taulahon haluanta di bagasan biar dohot lomos ni roha.
Sai didongani Debata ma hita di ariari na ro on mandalanhon ngolunta gabe ngolu na mampanghorhon na denggan tu na di humaliangta. Unang ma tapaimaima sahat tu na sudea gogonta, marsahit pamatangta siala ni umurta naung matua. Alai uju tarbahen hita dope tapatupa ma mandalanhon ngolungolunta gabe marhangoluan na mampanghorhon na tung mansai denggan tu angka na di humaliang hita, manang aha pe ulaonta be. Amen.
