 |
| Ginurithon ni Pdt. Dr. Robinson Butarbutar, Ephorus HKBP |
GREENBERITA.com- Hata ni Debata tu si Jakob di nipina, "Ida ma, sai dongananku jala ramotanku do ho manang tu dia pe ho mangalangka jala togihononku do ho mulak tu tano on" (ayat 15) diuduti di barita pardalanan ni si Jakob sian huta ni Amongna di Kanaan tu huta ni Tulangna si Betuel di Padang-Aram dohot isi ni tangiang ni si Jakob tu Debata di tangiangna dung tarsunggul ibana sian inganan parpodoman nang nipina i dohot hata na mangihut on:
"Molo didongani jala diramoti Debata ahu di dalan na hudalani on, jala dilehon di ahu sagusagu sipanganon dohot ulos siporuloshononhon, jala marsonangsonang ahu mulak ditogihon tu bagas ni damang, sai Jahowa ma Debatangku, jala batu na hupajongjong on bahen partinandaan, i ma gabe bagas ni Debata, jala sude na nilehonMi tu ahu parsampuluhononku" (ayat 20-22).
Taida, hamu angka dongan, atik pe so pola adong dipangke Debata hata 'Molo' di manang andorang so dipatolhas Debata bagabagaNa tu si Jakob, lapatanna so pola marsyarat bagabaga pandonganion dohot pangaramotionNa i, marbagabaga do si Jakob tu Debata, na patupaonNa sipatupaonna tu Debata molo saut bagabaga ni Debata i tu ibana di pardalananna i.
Disi, taida di pardalanan na maol di parhorsihan i, sian tano Kanaan tu tano Haran i, ditambahon si Jakob do di tangiangna i dua na mangihut on. Na parjolo, dua rumang ni pandonganion dohot pangaramotion ni Debata na dapot rohana binagabagahon ni Debata tu ibana/niaropna sian Debata, bagabagana tu Debata i ma:
(i) dilehon di ahu sagusagu sipanganon dohot ulos siparuloshononhon, ndang anturaparan jala mate, jala ndang ngalian mamolus borngin na ngali dohot mangadopi udan, jala (ii) marsonangsonang ahu mulak tu bagas ni damang, i ma keamanan so dihahua manang ise dohot manang aha uju di pardalanan tu jala sian bagas ni tulangna. Paduahon, ditambahon ibana tolu bagabagana sipatupaonna tu Debata molo dibasabasahon Debata tu Ibana duansa tangiang pangidoanna i, i ma (i) Jahowa ma Debatangku, (ii) batu na hupajongjong on gabe bagas ni Debata, (iii) sude na nilehonMu tu ahu parsampuluhononhu ma i tu Ho.
Tarida di turpukta i, ndang holan bagabaga ni Debata tu si Jakob, alai sahat do tu bagabaga ni jolma i, si Jakob, tu Debata, mambahen uli ni jamitanta sadarion. Sada sangkap ni Debata sian simalolong ni Debata dipapatar tu si Jakob na tongon mangulahon sada situjuonna, i ma munsat sian bagas ni natorasna na tongong dilele hahana si Esau tu huta ni Tulangna na dao jala gok mara. Dipajonok Debata diriNa tu si Jakob marhite nipi ni si Jakob, pabotohon na donganan dohot ramotanNa do si Jakob disi, alai dipajonok si Jakob tong dirina tu Debata marhite na dipatolhas ibana sada sangkapna patupa na denggan tu Debata molo didongani jala diramoti Debata ibana.
Hamu angka dongan, mansai ringkot duansa bagabaga i auhononta di ngolunta songon na porsea di hadirion dohot huaso ni Tuhanta nang tanggung jawab ni hita ruas ni HKBP na porsea jala naung pinatigorNa di bagasan Jesus Kristus di parngoluonta na sangombas i di portibion, di na mandungdung sangkap ni Debata di ngolunta na mambasabasahon ngolunta na argai tu hita, jala na mambagabagahon na donganan jala ramotanNa do hita sahat tu ujung ni nasa na adong on.
Mansai ringkot na parjolo i, i ma haporseaon dohot pos ni rohanta di Ibana tarlumobi di na taadopi angka tantangan na bolon di portibion nuaeng, sada isarana ima krisis ekonomi naung pinatolhas tu sandok HKBP na masa siala ni bahat sibonsiri, dohot ma i siala ni porang ni Rusia maradophon Ukraina, na so marna mansohot sahat tu tingkion, gariada lam jebu, na marpanghorhon tu na hurang sipanganon ni angka jolma di portibion. Jala, siala ni na lam tamba mohop ni portibion gabe bahat angka bangso di portibion na so dapotan siinumon, sada sian na mansai ringkot di ngolu ni jolma nang angka na tinompa na asingna i.
Di tongatonga ni bangsonta pe, nang pe taradopi bangsonta do krisis ekonomi i siala denggan ekonominta panghorhon ni angka habisuhon na pinatupa ni pamarentanta mamangke denggan pasupasu na dilehon Debata tu bangsonta marhite angka sumber daya alam, ala nunga jotjot disoarahon Menteri Keuanganta na mansai balga do tantangan na taadopi songon bangso. Isarana, pangidoan ni angka bangso tu na tapatupa di negaranta, gabe moru do godangna siala ndang tung angka bangso na asing manuhorsa.
Di partingkian na songon i, denggan situtu do hita bangso Indonesia ndang marimbar ruas ni HKBP asa hot marhite tangiangta mangidohon tu Debata asa didongani bangsonta jala diramoti hita mangadopi angka tantangan i.
Hita angka natuatua, naung bahat marnida hasisintong ni hata ni Debata na mambagabagahon pandonganion dohot pangaramotion ni Debata di ngolunta, ngolu ni bangsonta, nang di huriaNa, mansai ringkot maniroi angka sundut naumposonta asa marhaporseaon tu Debata na burju mandongani dohot mangaramoti hita, gariada mamasumasu hita lobi sian na tapangido dohot na tatagam sian Debata. Mamungka sian na metmet hita, gariada mamungka sian bortian ni Dainang, mamolus ragam ni tantangan i, nunga taida pandonganion dohot pangaramotion ni Tuhanta Sitolusada i, uju so apala tung balga tantangan na taadopi, laos dohot do nang uju taadopi na so tarbahen hita mangadopisa sian gogo, malo nang bisukta.
Ringgas ma hita manghaporseai i dohot mangajarhonsa tu angka pomparanta. Unang paposhu rohanta tu gogonta sandiri. Pos ma rohanta tu Ibana marhite na tongtong mangulahon na tarbahen hita.
Alai tong ma satia hita manggohi padanta molo adong padanta tu Debata na patupaonta do sipatupaonta molo taida tangan ni Debata mandongani dohot mangarmoti hita. Taida ma jolo tolunsa padan ni si Jakob i.
Naparjolo i ma: Padanta na Jahowa do Debatanta. Mansai ringkot on di partingkianta nuaeng. So tong tabahen gabe Debatanta angka na asingna i. Hamaloon ni hajolmaon di tingkion na tuk patupa Artificial Intelligence pe sotung tabahen gabe debatanta. Angka naung targoar sian narobi tu partingkion boi gabe dipardebata jolma pe, i ma na adong di duru ni dirinta, nang na adong di dirinta sandiri, hita gabe tapardebata, unang ma tasomba. Paduahon, manomba Debata manang di dia pe hita maringan. Pajongjong bagas joro ni Debata nang bagas partangiangan pe denggan do tapatupa, songon naung tahasomalhon di HKBP. Songon i do tong mambahen bagasta sandiri gabe bagas partangiangan.
Tung so adong pe padanta tu Debata mansai denggan do tahamauliatehon tu Debata pandonganion dohot pangaramotionNa i di hita, di keluarganta, di bangsonta, marhite pujian nang hamauliateon tu Ibana, na di hurianta HKBP tapatuduhon marhite na burju hita pasahat pelean hamauliateon tu Debata di panombaanta tu Debata. Peleanta i nuaeng, angka dongan, dipangke Debata mangulahon ulaonNa marhite HKBP na tarjou mamaritahon ulaon mamaritahon barita padimundimun parsaoran, mamaritahon barita nauli dohot patupa ulaon holong tu angka donganta jolma.
Nuaeng marhite peleanta na 55% tapasahat tu Sentralisasi Parhepengon nunga boi tasarihon balanjo ngolungolu ni partohonan gok tingkinta, jala nangetnanget tatea na ringkot tu biaya operasional nang program di resort, distrik dohot hatopan. Mangihuthon laporan ni Badan Pengelola Sentralisasi Parhepengon ni HKBP, naung tarbahen pungu sian sude pelean na tapasahat tu Sentralisasi Parhepengon i 63,35% dope. Marhite na umburju hita pasahat peleanta tu Debata pangkeonNa mamasumasu ulaon ni HKBP dohot na ringkot tu ulaon ni HKBP boi ma nian sahat tu 80% na tardungdung hita asa boi tagohi na ringkot tu balanjo pangula, biaya operasional nang program. Tumangkas naung tardungdung hita sian 63,35% i ima di bulan Januari-Juni 2023 i ma Rp194.699.041.160 Na taparsinta tadundung i ma Rp297.923.376.630.
Ala ni i, hamu angka dongan, duansa bagian ni jamita i do na gabe tona tu angka na porsea di sandok portibion, marsiajar sian ngolu ni si Abraham na targoar 'dongan ni Debata,' na tarbarita siala ni haporseaonNa tu Debata, jala tuat i nuaeng tu pahompuna si Jakob, jala tuat tong i tu hita angka pomparan haporseaon ni halak Kristen marojahan tu haporseaon ni Jesus Kristus na tung mansai togu tu Debata Ama i, di ngolu nang ulaonNa, uju so apala balga tantangan i nang uju di rura ni linggoman ni hamatean, jala na patuduhon hasisintong ni haporseaonNa i, ai di hamatean pe diramoti jala dipamonang Debata do Ibana, jala hita pe nunga taida di ngolunta marsadasada.
Alai laos dohot do tarida di ngolu ni si Jakob nang angka pomparanna sahat tu nuaeng hinaburju nasida mamelehon marragam pelean tu Debata, dalan manghamauliatehon. Pola marbagabaga ibana pasahatonna 10 persen sian nasa na pinalumehon ni Debata di ngoluna tu Debata.
Nunga denggan nian barita taringot tu hita HKBP tu portibion, i ma taringot tu hinatogu ni HKBP manjungjung baringinna, i ma di personel, di teologi nang di dana. Alai molo lam tarihuthon ruas nang partohonan ni HKBP tinonahon ni turpuk jamitanta sadarion taringot tu 'pandonganion dohot pangaramotion' ni Debata na dijaha si Jakob uli patupaon marhite na tong mambagabagahon na denggan tu Debata dung taida pandonganion dohot pangaramotionna angka ulaon na denggan, dohot ma i manghatindangkon “Jahowa do Debatangku," pajongjongonku ma bagas joroNa laho manomba ibana, huhut pasahat hamauliateon tu Debata marhite mamelehon 10% sian pasupasu na pinalumehonNa tu hita dung didongani dohot diramoti, tarlumobi mangadopi angka na mambahen hita ndang tarpasupasu.
Ala ni i, panimpuli, taparsiajari ma ngolu ni si Jakob i na manjalo bagabaga pandonganion sian Debata, jala na marbagabaga tong tu Debata molo saut bagabagaNa i tu ibana, I ma manomba Debata Jahowa, pajongjong bagas joroNa jala pasahat pelean hamauliateon 10 persen sian parbue ni pandonganion nang Pangaramotion ni Debata di ngoluna, Amen.
