 |
| Ginurithon ni Pdt. Dr. Robinson Butarbutar |
Hamu Angka Dongan hinaholongan...,
Ganup tajaha, tabege, tarimangrimangi, dohot taauhon huhut tasangkapi mangulahon hata ni Debata na di tarsurat di buku Psalmen i, lam bagas do tatanda hadirion ni Debata sian pamerengon ni hajolmaon naung marnida dohot manghaposi taringot tu haDebataonNa. Asa, ndang songon hataNa na di buku Panurirang na patolhashon isi ni rohaNa tu hita jolma, hadirionNa dohot parnidaanNa taringot tu pangalahonta huhut paboahon dia sipatupaonnta taringot tusi, isarana asa muba hita sian hajahatonta, manang asa tapaimbaru dalan ni ngolunta na so saurdot tu lomo ni rohana, asa malua hita. Alai sian pamerengonta sandiri taringot tu ise Ibana asa tahaposi Ibana, i do ia rumang ni hataNa sian buku Psalmen 65:1-9.
Songon i bagas panandaionta taringot tu ise Ibana Debatata i jala dia na tarpatupa Ibana tu hita jolma na manghaposi Ibana nang na so manghaposi Ibana, sampe pola diendehon panandaionta i.
Panandaion ni parPsalmen i taringot tu ise Debata dohot dia na tarbahensa di ngolu ni hajolmaon di portibion i marhadomuan do jotjot-an tu hadirion ni hajolmaon i sandiri na dipatolhas parPsalmen i di ende tangiangna uju paadop bohi manang manghatai dohot Debata, isara taringot hadirion ni jolma na marhagaleon, na mura madabu tu bagasan dosa, pardosa, nang hadirion ni jolma na mura matapar, na so manongtong marhagogoon dohot marhahipasan, na so tarbahensa sahalakna manang sabangsoNa mangadopi angka 'tantangan na marragam' niadopanna.
I do na gabe jamita di hita di Minggunta sadarion. Molo songon i gabe jamita di hita, ditogihon do hita asa olo marguru sian parPsalmen i taringot tu panandaionna i. Holan marhite haradeonta na songon i do boi gabe hata ni Debata tu hita di tingki on jala martua hita.
Adong lima hadirion dohot hatauon ni Debata na diongku dohot diendehon parPsalmen i.
Naparjolo, na manangihon tangiangta tarlumobi tangiang hasesaan ni dosa jala na manesa dosa (ayat 1-3); Napaduahon, na paso hauasonta di panarihononNa tu na ringkot di ngolungolunta (ayat 4);
Napatoluhon, ima na mangaramoti; napaopathon ima paluahon sian angka na mandondoni hita marojahan tu hatauonna manompa langit dohot tanoon ndang marimbar angka dolok nang angka galumbang ni laut na balga nang na tunduk tu Ibana (ayat 5-8); jala napalimahon, na marmudumudu na tinompa na asingna i isara angka duhut (ayat 9-15).
Sada sian na lima i do, i ma na patoluhon, I ma Debata na mangaramoti bangsoNa.
Hamu Angka Dongan hinaholongan...,
Mansai ringkot jamita on di partingkionta nuaeng ala ni na dua na mangihut on. Naparjolo, ala panandaion ni parPsalmen taringot tu Debata na mangaramoti bangsonta i dipatolhas di partingkian na robi, dao andorang so sahat parbinotoan dohot hatauonna ni hajolmaon mangaramoti dirina sian angka mara, sian angka na manusai ngoluna. Mangolu mardonganhon angka ulaula ni ngolu na terbatas dope. Martani pe tradisional dope. Marpinahan pe tradisional dope.
Habisuhon ni ngolu na tubu sian ngolungolunta na tradisional dope. Dohot hata na jempek, molo tapangke parbinotoan nang hatauon ni jolma i nuaeng mansai terbatas dope mangadopi angka namaol di ngolu on. Marsigantung dope jolma i tu Pangaramotion ni Debata. Alai nuaeng on nunga tung timbo hatauonna ni jolma i mangadopi tantangan ni jolma i, dohot ma tong hatauonna manguba tu sahit na posa situtu pe. Paduahon, nuaeng on dung Revolusi Industri na parjolo, paduahon, patoluhon, dohot paopathon jala nangkok do tong i hatop, mansai hatop do tamba parbinotoan ni jolma i, gabe ndang apala diharingkothon jolma i be Pangaramotion ni Debata.
Marhite Artificial Intelligence nunga mangasahon i jolma i mangaramoti dirina. Ndang diharingkothon be Pangaramotion ni Debata. Songon i ma timbona parsigantungon ni jolma i di hatauonna di Artificial Intelligence i gabe be pola mangarop jolma nuaeng on di Pangaramotion ni Debata, atik pe diboto do sai adong dope hurang sikkop ni Artificial Intelligence naung pinajadi/binahen ni jolma i.
Ala ni i, denggan do parjolo tapasunghunhon tu dirinta be manang na songon dia haporseaonta di hatauon ni Debata mangaramoti hita di ngolu on. Hot dope songon parPsalmen i atik pe nunga tardungdung hita parbinotoan si nuaeng on di na mangaramoti dirinta, manang ndang be, gabe tadok tarbahen hita do mangaramoti dirinta so ingkon tajauhon tu Debata asa diramoti hita?
Di bona ni Taon 2023 on, adong do sada Sintuanta di DKI na laho tu Sibolga, mardonganhon supir naung loja siala ro sian Medan do supir i. Alai, nang pe sai dilalaplapi Amanta i supir i unang mondokondok, tompu ma magulang Mobil i tu rura na bagas, i ma 30 meter. Alai ndang nanggo adong na hansit diae Amanta i. Dung sahat ibana tu Pearaja, didapothon ma ahu di bagas dinas ni Ephorus laho mangido tangiang, i ma tangiang patogu tondina. Huhut ma tahe tangiang hamauliateon.
Ndang kebetulan i, alai dihaposi Sintua i alani Pangaramotion ni Debata. Uju I nunga tung leleng ibana paimahon naek pangkat nian ibana di ulaon na di bank Mandiri. Na di 7 Juli i nangkok do jabatannya, gabe direktur di sada unit pelayanan ni bank i.
Isara na marasing do nabaruon pilot ni pesawat sian pilot sinuaeng, ala nuaeng on hira do apala marsigantung tu pilot i be masin ni pesawat i uju habang. Boi do modom pilot i, manang ditadingkon Cokpit ni pesawat i. Nunga tung jago masin i. Songon i do tong angka alat-alat vital ni negara nunga robot be manjagai, ndang jolma i be.
Ala ni i holan di Indonesia on dope didok di pesawat asa martangiang mangihuthon haporseaonta angka panompang. Alai di Eropa ndang be. Manang di Afrika dohot di Asia, molo nuaeng haruar iba sian jabu tu pardalanan na donok nang na dao, sai tapangido do di tangiangta asa diramoti Debata hita.
Ala ni i, denggan ma tasulingkiti haporseaonta tu hatauon ni Debata mangaramoti hita. Hot dope manang ndang be?
Amen.
