 |
| Ephorus HKBP Pdt. Dr. Robinson Butarbutar, bersama jemaat HKBP Sampit |
GREENBERITA.com- Hamu angka Dongan hinaholongan..,
Di hata Inggris adong do sada pandohan na patuduhon pamingkirion na mandok na sada denggan, alai na sadanari dao dumenggan.
Songon on ma panghulingna, isarana: 'To believe in something is one thing, but to see what one believes in while living is another. Blessed are those who see so.'
Hata Batakna: 'Porsea di sada hal i ma sada, alai marnida dia na hinaporseaon uju mangolu dope iba, i ma sada hal na asing. Martua ma nasida na marnidasa.'
Molo di ngolungolu na boi pangkeon laho patorangkon i, songon on ma isarana: Manghirim na di sada tingki boi sahalak na imbaru tammat SMA, asa boi dapotan inganan marsiajar di Universitas Gajah Mada i ma sada hal. Alai marnida na hinirim di taon na salpu asa masa di ibana songon i, i ma masuk ibana tu UGM di taon on, i ma sada hal na asing. Martua ma na manidasa.
Isarana na asing songon on: Manghirim di taon 2024 boi adong nian sada sian ruas ni hurianami di hutanami gabe tarpillit di Pemilihan Umum Legislatif Maret/April 2024 on i ma sada hal. Alai saut tarpillit sada sian ruas ni hurianami di April 2024 gabe DPR RI i ma sada hal na asing. Martua ma na marnida hasasaut ni na hinirimna i.
Songon i do na pinatolhas ni Apostle Petrus di bagas joro na di Jerusalem uju di partingkian martangiang tu halak Israel na disinon taringot tu hadirion ni Jesus dohot hasasaut ni sangkap ni Debata marhite Ibana dung dipamalum ibana sahalak na mapangpang mamungka di bortian ni Inongna: Umbege, jala jumaha panurirangon dohot tangiang ni na porsea taringot tu haheheon ni na mate i ma sada hal.
Alai marnida hasasaut ni haheheon ni Jesus dung diuhum, mate jala ditanom tu udean di tingki ni ngolu nasida nuaeng i ma sada hal na asing. Martua ma na marnida partingkian i.
Na dos tu si didok: Umbege, jumaha jala manghaporseai bagabaga pasupasu ni Debata tu si Abraham na marhite pinomparna tarpasupasu ma sude bangso di portibion i ma sada hal.
Alai marnida hasasaut ni i marhite pomparanna, Jesus na sian Nasareth marhite haheheonna, buha baju ni haheheon ni angka na mate di bagasan Tuhan i, i ma sada hal na asing. Tarpasupasu ma hamu naung marnidasa di bagasan diri ni Jesus Kristus na sian Nasareth i.
Hamu angka dongan, panurirangon taringot tu haheheon ni angka na monding i ma sada hal na disurirangkon Debata marhite angka panurirangNa. Jala manghaporseai haheheon ni pamatangna dung monding i do tong na dipatolhas ni na porsea di Debata songon na tarsurat di buku Habisuhon, buku Psalmen nang si Job nang buku Daniel.
Alai marnida hasasaut ni panghirimon nang panurirangion taringot tusi i di abad parjolo ma sada na marasing sian na manurirangkonsa dohot manghaporseaisa i ma hal na asing. Martua ma naung marnida i di bagasan haheheon ni Jesus Kristus, buha baju ni haheheon ni na mate i, i ma angka naung dipasupasu Debata, angka naung mulak sian hajahatonna be.
Ndang apala na parjolo i, i ma manurirangi dohot manghaporseaisa ianggo na gabe jamita di hita. Alai na paduahon i do, i ma hamamasa ni haheheon ni na monding i di bagasan haheheon ni Jesus Kristus, buha baju ni haheheonta muse, nang pe masirainrainan do duansa.
Taida ma jolo panurirangon dohot haporseaon taringot tu haheheon ni na monding i sipatupaon ni Debata i di Padan Narobi:
Parjolo, panurirangion taringot tu haheheon ni angka na mate nunga disurirangkon panurirang Hosea, Jesaya, nang Hesekiel, songon na tarida di na mangihut on:
'Sai pangoluonna do hita dung salpu dua ari, tole patoluarihon paheheonna hita, asa mangolu hita maradophon ibana (Hosea 6: 2);'
'Sian tangan ni parbeguan paluaonku nasida, sian hamatean tobusonku nasida! Didia angka begu antukmu, ale hamatean? Didia hamagoanmu, ale banuatoru, tung na so hutanda do ruhut ni solsol ni roha (Hosea 13: 14);'
'Bondutonna ma hamatean salelenglelengna jala apusan ni Tuhan Jahowa ma iluilu sian nasa bohi, jala padaoonna ma haurahon ni bangsona di sandok tano on, ai nunga Jahowa mandok i (Jes 28: 8);'
'Mangolu do ianggo angka na matem, hehe do muse bangkengku. Ngot ma hamu jala marolopolop hamu angka isi ni orbuk? Ai nambur ni angka panondang do namburmu, jala paruaron ni tano i muse angka naung mate (Jesaya 26: 19);'
'Alai dihalomohon Jahowa do parsipalna mangae sahit! Ia dung dilehon hosana bahen pelean pardengganan, idaonna ma boni jala paganjangonna ariarina, jala manjadi ma lomo ni roha ni Jahowa marhitehite tanganna (Jesaya 53: 10);'
'Jadi ninna ibana ma tu ahu: Ale anak ni jolma! Atehe tagamon tarpangolu dope angka holiholion? Gabe ningku ma: Ale Tuhan Jahowa, ho do umbotosa! Jadi ninna ibana ma tu ahu: Manurirangi ma ho taringot tu angka holiholion, jala dohononmu ma tu nasida: Ale holiholi angka na masak i, tangihon hamu ma hata ni Jahowa! Songon on do hata ni Tuhan Jahowa tu angka holiholion: Ida ma, ahu mangalehon tondi tu bagasan hamu, asa mangolu hamu (Hesekiel 37: 3-5);'
Paduahon, angka na tung bagas, togu, dohot hiras haporseaonna di Debata, songon i do tong dipatolhas di isi ni tangiangnasida taringot tu haheheonnasida, songon na tarsurat di buku Habisuhon na umposo (Job) dohot na tumua (Psalmen).
'Jala ia dung malangke hulingkulingkon, jala malua ahu sian sibukkon, idaonku ma Debata (Job 19: 26).'
Songon i do tong haporseaon ni parPsalmen: 'Alai anggo ahu sai idaonku do sogot bohim, marhitehite hatigoran, pamahaponku ma rohangku marnida rupam, ia dung tarsunggul ahu muse (17: 15);'
Ai ndang tagamon pasombuonmu tondingku di banua toru, ndang tagamon loasonmu hasianmu marnida habusukon (16:10).
Napatotulhon, lumobi ma ditiop parhaporseaon na tongon mangadopi parungkilon siala ni angka parhuaso na manindos angka na porsea di Debata, na mamaksa nasida asa manundalhon Debata baliksa manomba debata ganaganaan na binahenna, i ma di partingkian abad pa-2-hon, dung songon i leleng sitaonon i diae nasida siala manghaporsai Debata. Songon on ma dipatolhas haporseaonna taringot tu haroro ni na marhuaso di ginjang ni saluhut, na mangihuthon Evangelium digohi di bagasan diri ni Jesus Kristus na mate alai hehe di ari patoluhon:
Dung i huida muse di bagasan angka pangungkapon borngin, gabe ida ma, ro sahalak marhitehite ombun di langit i, songon anak ni jolma, jala sahat ibana tu ibana na so suda arina, jala tarboan ibana tu jolona.
Jala dibasabasahon ma tu ibana pamarentaon dohot hamuliaon dohot harajaon, jala saluhut bangso, houm dohot halak parpangkuling marragamragam marsomba tu ibana. Ro di salelenglelengna do pamarentaonna, na so tupa munsat sian ibana, harajaonna pe na so tupa pesan do (Daniel 7: 13-14).
Haporseaon na masa do hasasaut ni pamareantaon, hamuliaon dohot harajaon songon sinurirangkon ni Daniel i uju manaon bangso ni Debata dipatolhas Jesus do tu angka siseanna. Tarsurat do i di Evangelium Matius 24: 1, 30-31.
Laos tauduti ma bagabaga ni Debata na tu si Abraham i na marhahonaan tu hita, angka ruas ni Huria Kristen Batak Protestan di sandok HKBP, songon on:
Di si Abraham umbege bagabaga ni Debata na sian pomparanna, Jesus Kristus na sian Nasareth i marhite haheheonNa gabe pasupasu tu sandok bangso di portibion, i ma na so marujung di hamatean na manghaporseai Ibana alai managam di haheheon sian angka na mate tu hangoluan na manongtong songon Jesus Kristus i sandiri naung hehe sian na mate, pinahehe ni huaso ni Debata, i ma sada hal.
Alai marnida na naung bahat angka bangso, parsidohot hita ruas ni HKBP naung porsea di Jesus Kristus naung hehe i jala siala ni i parsidohot do hita paheheonNa di ari sogot sian hamateanta be i ma sada hal na asing.
Manghirim asa dipasupasu Debata sude hita ruas ni HKBP, pomparan haporseaon ni si Abraham, i ma sada hal. Alai manghirim na uju marumur 200 taon HKBP nunga sude ruas ni HKBP gabe pasupasu tu portibion i ma saha hal na asing. Martua ma ruas ni HKBP na marnida hasasaut ni i mamungka nuaeng sahat tu uju marumur 200 taon HKBP. Angka na porsea di Haheheon ni Jesus binahen ni huaso ni Debata tarbahensa do marnida i di ngolunta on.
Parsinode na di Sinode Godang HKBP 1970 manahi asa taeahi di HKBP patupa Sentralisasi Parhepengon asa boi denggan mardalan ulaon panghobasion ni HKBP natolu i, i ma sada hal. Alai marnida hasadaon ni sandok ruas ni HKBP pasauthon i mamungka 1 Januari 2023, i ma 52 taon dung tatahi i di toan 1970, di partingkian digital nuaeng na patau hita patupasa pasahat pelean lumambatna di ari patoluhon dung masa parmingguon, partangiangan di huianta, i ma sada hal na asing.
Martua ma naung marnidasa di taon 2023, sahat tu ariari na ro di na lam denggan panghobasion tu ruas ni HKBP dipatupa sude angka partohonan, na gok tingki dohot na so gok tingki, nang parhalado na so partohonan, sahat tu sude boi tatuhuk marhite Sentralisasi Parhepengon i, i ma Balanjo ni partohonan gok tingki, na ringkot tu operasional nang program resort, distrik, nang hatopan. Martua ma hita manidasa. Gari Jesus naung mate boi dipahehe Debata, lam ma na taharingkothon pasauthon Sentralisasi Parhepengon i.
Manghaporseai na huaso haheheon ni Jesus i uju pasahat tohonan hapanditaon di bulan April 2021 di HKBP Pearaja, na marhuaso tong mangurupi HKBP pasidunghon utangna tu angka partohonan na pensiun i ma sada hal.
Alai marnida di bulan Desember 2022, i ma 1,8 taon dung pinatolhas huaso haheheonna i, i ma nunga sidung utangta HKBP tu Dana Pensiunna, jala nuaeng nunga digarar be ganup bulan utangta tu Dana Pensiun ganup bulan sian Sentralisasi, i ma sada hal na asing. Martua ma naung marnidasa.
I do hamu angka dongan na tapestahon di pesta paduahon di pesta paduahon parningotan di ari Haheheon ni Tuhan Jesus Kristus, i ma ndang holan mamestahon haheheonna sandiri, jala manghalashon haheheonta muse, alai dohot do manghalashon hagogoon ni Debata umbagabagahon angka sangkapNa nauli di ngolunta ngolu hajolmaon nang ngolunta marsadasada nang marsasahuria i, alai dohot do di hatauonna pasauthon sangkap na na mansai uli di ngolunta.
Sangkap na denggan na sinangkapanNa di ngolunta tu ariari na ro i, na boi do taida jala boi do ndang taida dope di ngolunta nuaeng, alai molo marsangkap na denggan Debata di ngolunta, porsea ma hita di hagogoon ni Debata pasauthon i.
Mansai ringkot do i tahaposi songon ruas ni HKBP di na mandalani ngolungolunta di portibion, mandungdung sintasintanta, dohot manangkapi na denggan di ngolunta rap dohot Debata dohot patupasa. Gari Jesus Kristus na mate boi dipahehe Debata. Lam ma angka tantangan na tumoru sian i.
Mansai bahat do angka na boi tapatolhas naung tadai di ngolunta on taringot tu panghirimonta sian Debata, jala hasasaut ni na tahirim i di ngolunta di bahen Debata. Songon na pinatupaNa pahehe naposoNa na burju i, Jesus Kristus na unduk pasauthon tu sangkapNa manaon i, nuaeng nunga dipatimbo satimbotimboNa marhite haheheonNa i, songon i ma tong haporseaonta di Ibana di ngolunta, di ulaonta songon angka naposoNa, mandai hagogoon ni Debata di ngolunta. Amen.
(Penulis saat ini melayani sebagai Ephorus HKBP di Kantor Pusat Pearaja Tarutung)
