 |
| Oleh Pdt Dr Robinson Butarbutar |
GREENBERITA.com- Hamu angka Dongan hinaholongan.,
Dung Pandita ahu di tongatonga ni Hurianta, Huria Kristen Batak Protestan, on dope di Ulaon Parningotan di Sitaonon ni Jesus di Hau Pinorsilang i dohot di ari Hamamatena hata ni Debata na gabe jamita ndang sian Evangelium na opat i, sian evangelium Markus, Mateus nang Lukas na di bagasanna dipatuduhon mansai tangkas angguk-angguk ni Jesus-ta i di hau pinorsilang, Eli Eli Lama Sabachtani, ale Amang boasa tadinghononMu ahu (Markus 15: 34), alai sian surat Heber, na sian bona sahat tu ujung, sian bindu sada sahat tu bindu 13, patolhashon ragam ni hasurungan ni Jesus, dohot sangkap asa manahan angka naporsea sijaha surat Heber i na tongon mangadopi pangunjunan na dokdok, pangunjunan na pola mambahen na porsea i losok ro tu habangsa parasian ni Debata, losok marsaor dohot donganna sahaporseaon, pangunjunan na pola mangunjuni naporsea i asa mulak musa tu haporseaon na robi na so manahan di haporseaon di Jesus Kristus.
Di partingkianta nuaeng, di naung 161 taon Huria Kristen Batak Protestan dipajongjong Tondi Porbadia, di partingkian sinuaeng, di na bahat hajolmaon di portibion manaon siala ni marragam sibonsiri, isara panghorhon ni porang pinatupa ni Presiden Putin sian Rusia maradophon Ukraina, na mambahen bahat angka negara na ekonomina marsahit, dohot nang panghorhon ni mohop ni portibion, dohot na adong angka na porsea i manaon siala satia mangihuthon Jesus i ibana, atik be bahat parungkilan di ngolu nang pangunjunan diadopi naporsea i, mansai ringkot do jamita di parningotan di Hamamate ni Tuhanta Jesus na dienet sian surat Heber on, ala disurathon surat Heber i tu angka na porsea na tongon tarunjun laho manadingkon haporseaon di Jesus Kristus, mulak muse tu haporseaon na robi, manang manjalo pamingkirion ni angka na so porsea di Jesus Kristus di tingkion, gariada na paburuburu angka na porsea di Ibana.
Di surat Heber on, tarlumobi di Heber 5: 7-10 on angka Dongan, ndang holan (i) sitaonon na dokdok niadopan ni Jesus di hau pinorsilang i, i ma joujouNa na tong dijouhon parPsalmen 22:1, Eli, Eli, lama sabachtani, ale Debata, ale Debata, boasa tadinghononmu ahu, manggombarhon na di bagasan hatahuton Ibana mangadopi hamatean i, asa dipalua nian ibana sian hamatean i, pola marsoara joujou na gogo Ibana andorang so monding, na dipatolhas di Heber on marhite hata on:
Tagan jolma Ibana, dipelehon do angka pangidoanna dohot elekelekna, mardongan angguk bolon dohot iluilu tu na tuk paluahon Ibana sian hamatean; alai dohot do na so apala digurithon di evangelium Markus, Mateus dohot Lukas i, i ma (ii) alus ni Debata AmaNa: jadi ditangihon do Ibana, gabe malua sian hatahuton i (Heber 5: 7), songon i nang (iii) pangoloionna mangadopi hamatean i, Ai atik pe Anak i Ibana, diguruhon do pangoloion marhite sian na tinaonna i (5: 8), alai (iv) lumobi di hita angka naporsea di Ibana mamungka sian abad parjolo sahat tu nuaeng, panghorhon ni sitaonon dohot hamamateNa i, i ma Jala dung rimpas gabe sihorhon haluaon salelenglelengna do Ibana di sude na mangoloi Ibana (ayat 9), Sintua ni malim sian horong si Melkisedek (5:10).
Ringkot do rimangrimangonta na parjolo sahat tu na patoluhon i, asa taargahon panaononNa i, unang neang rohanta mida panaononna i. Alai jamitanta sadarion napaopathon i do na gabe topik ni jamitanta na mansai ringkot tarimangrimangi, taauhon, tajangkon dohot tahalashon di parningotan di ari hamamateNa i: Ibana gabe sihorhon haluaon salelenglelengna di sude na mangaoloi Ibana (5: 9).
Uju manggurithon evangeliumna, evangelis Markus ndang apala digurithon jala diondolhon ibana i, da holan sitaononna i na diondolhon ibana. Jala nang di evangelium ginurithon ni evangelis Johannes pe, ndang haluaon salelengna (Gorik: soterias aioniou, Indonesia: Keselamatan Selama-lamanya) didok, alai hangoluon salelenglelengna di na porsea di ibana, i ma hangoluan sisalelenglelengna i (ida Joh 3: 16, jala 20:31: Alai umbahen na sinurat angka on, asa porsea hamu, Jesus do Kristus, Anak ni Debata, jala asa hamu angka na porsea i dapotan hangoluan marhitehite goarna).
Ala ni i niondolhon ma tu hita na niondolhon ni hataNa di Heber 5:9 i, Panaonon dohot hamamate ni Jesus di hau pinorsilang i ndang asal masa boti hape i, ulaon ni Debata Ama niundukhon ni Jesus Kristus AnakNa i di bagasan angguk bolon laho palumehon haluaon salelenglelengna do, soterias aioniou, keselamatan kekal.
Songon na ginurithon di bona ni jamita on, surat Heber i mangondolhon hasurungan ni hadirion nang ulaon ni Jesus i sian angka hadirion nang ulaon ni angka naung dipangke Debata di tongatonga ni bangsoNa, isara si Musa, dohot angka malim na mamelehon pelean na marulakulan laho manesahon dosa ni bangso i nang dosana sandiri, songon i nang angka surusuruan pe tahe, asa manahan porsea na porsea i, ndang ditaluhon pangunjunan na dokdok. Siala ni i do diondolhon panghorhon ni hamamate ni Jesus di hau pinorsilang i: Gabe sihorhon haluaon salelenglelengna, ndang haluaon na satongkin, mulak-ulak, alai haluaon salelenglelengna, haluaon na permanen di angka na porsea di Ibana, na tarbahen na asing manggugaisa, mambuatsa, jolma manang ndang, tantangan na balga manang ndang.
I do barita nauli na tong ingkon taingot di na dohot hita tumatangis marningot panaonon dohot hamamatena i sadari on, gabe sihorhon haluaonta na manongtong, salelengna do hamamatena i.
Haluaon hinorhon ni hamamate ni Jesus i singkop, hibul do i, i ma ndang holan haluaon sian dosa dohot hamatean songon panghorhon ni dosa i, alai dohot do haluaon sian angka huaso na pamatehon hajolmaon nang angka na tinompa ni Debata na asing i, nang sian angka mara, songon i nang angka na mandondoni jolma i.
I ma bidang ni na panghorhon ni hamamate ni Jesus di hau pinorsilang i. Alai i tu na porsea disi do mampanghorhon haluaon salelenglelengna hamamate ni Jesus i. Mansai ringkot i bagas tarimangrimangi. Mansai balga do hape ulaon ni Jesus di hau pinorsilang i di angka na porsea di Ibana dohot di ulaonNa na songon i di hau pinorsilang i. Ala ni i, so tung olo hita tarunjun manang tarunjun be manang taluhonon ni pangunjunan manang aha pe i, ala nunga dipalumehon tu hita haluaon salelenglengna i.
Rugi hita meret sian i, manang manadingkon i. Ndang adong na asing sihaporseaon ni hajolmaon na tuk palua hita salelengna. Holan panaononona i mamelehon ngoluna humohophon hita.
I do sipujion dohot sihamauliatehononta. I do umbahen na sipujionta Debatanta i ala nunga dipalumehon tu hita haluaon di Jesus Kristus i. Amen.
(Penulis saat ini melayani sebagai pimpinan HKBP di Pearaja Tarutung Sumatera Utara)
