 |
| Pdt Dr Robinson Butarbutar bersama Inang Ephorus |
GREENBERITA.com- Hamu angka Dongan hinaholongan..,
Nang pe ndang apala sude ngolungolu ni Jesus mamungka sian na tubu Ibana sahat tu hananangkoknNa tu Banua Ginjang digurihon, ia angka Evangelium na opat i, ndang apala boi dohononta ‘Riwayat Hidup’ ni Jesus na singkop.
Alai ia angka Evangelium i manaringoti angka tonggak-tonggak ni ‘ngolu’ (=jaha di Gorik” Bios) ni Jesus na sian Nasaret i do. Tarlumobi Evangelium ginurithon ni evangelis Markus, manurathon tonggak-tonggak ni ngolu ni Jesus na mardomu tu sangkap haroro ni Jesus tu portibion.
Di minggunta Minggu Palmarum/Maremare sadarion dienet sian sada bagian ni Evangelium ni Markus na manaringoti taringot tu bagian parpudi ni pardalanan ni ngolu ni Jesus.
Dibonai ibana do ulaonNa di Galilea, jala mardalan manuju tu Jerusalem do ia pardalanan ni ngoluNa, laho patupa sangkap ni haroroNa tu portibion songon Anak ni Debata na manaon sitaonon di hau pinorsilang i laho manobus dosa ni jolma.
Dung di minggunta sadarion sahat ma hita tu partingkian Passion, sitaonon ni Jesus. Ala ni i, tung mansai ringkot do di hita na mangarade masuk tu partingkian parningotan di sitaonon ni Jesus marnida aha na masa di pardalanan ni Jesus andorang so masuk Ibana tu inganan sitaononna i. I ma hamamasa pangaradeion panaononNa i.
Mamungka bindu 11 on do dipatorang aha na dipatupa Jesus andorang so manaon di Jerusalem. Na parjolo pinatupaNa i ma mamareso Bagas Joro na di Jerusalem (ida Markus 11:11).
Ndang mian di Jerusalem Ibana, alai di Betania/Bethpage, na so apala tung dao sian Jerusalem. Dung mulak muse Ibana tu Bethpage/Bethania, borhat do Ibana muse manogot na i tu Jerusalem laho patupa ulaon paiashon bagas joro disi naung pinaresoNa hian jala diida Ibana nunga ramun, ndang be bagas partangiangan, alai nunga gabe bagas pandobo dibahen.
Ulaonna paiashon bagas joro i do sada na mambahen angka uluan ugamo Jahudi na di Jerusalem marsada manangkapi manguhum Jesus (Markus 11:15-19). Alai na gabe jamita di hita ndang apala i, baliksa do, ima pardalananna na parjolo tu Jerusalem i do, na laho mamareso bagas joro na disi inon, jala dung i, paias bagas joro, na gabe sibonsiri ni sangkap ni angka uluan ni bagas joro i pamasuk Jesus tu sitaononNa.
Ala songon i ma ringkot ni haroro ni Jesus sian Galilea tu Jerusalem di Judea,
masa ma na boi dohonon pangaradeion tu partingkian sitaonon ni Jesus.
Pangaradeion i ro sian, manang di bagasan pamotoion na tangkas ni Jesus. Dia ma i?
Parjolo, Jesus i sandiri paradehon na ringkot tu pardalananna tu Jerusalem
i, alai di bagasan pangaradeionNa i ndang apala dipatuduhon Ibana na raja na ro marhoda Ibana, baliksa raja na marhalode do. Di hata Inggrisna tadok, ‘low profile’ do di bahen Jesus haroroNa tu Jerusalem.
Paduahon, dua siseanna na dibagasan unduk ni roha rade disuru Jesus patupa siulaonna nasida, i ma mandapothon sada sosor na so apala digoari goarna, laho mamboan sada halode na ambat di jonokhon ni harbangan ni sosor i sipangkeon ni Jesus nangkok tu Jerusalem, jala di na disungkun na marnida ulaon nasida i, asa dialusi na ringkot di Tuhan i do. Tamba ni i, na pinatupa ni angka sisean i, i ma mangampehon ulosdi atas ni halode i bahen parhundulan ni Jesus.
Patoluhon, sada halak siida ulaon ni dua sisean i na mangaloas nasida
mananggali halode na tambat i huhut mamboansa tu Jesus. Ndang apala didok manang na nampuna halode i ibana manang ndang. Alai ndang diorai ibana pinatupa ni sisean ni Jesus i. Ala na binegena mandok na ia ulaon ni sisean i laho mambuat gabe parnampunaonnasida do halode i, alai sipangkeon satongkin jala paulahonna do, ba ndang manjua ibana, alai mangaloassa do. I ma sada ulaon na mansai denggan, i ma mangaloas na ringkot di Tuhan i.
Paopathon, halode i sandiri, na dinangkohi Jesus laho patupa ulaonna di Jerusalem, i ma mamareso bagas joro ni Debata naung diramouni angka parhuaso ni bagas joro i. Arga do sude di ulaon ni Jesus i. Halode i pe marguna do di ulaonna.
Palimahon, i ma angka natorop patupa ulaon manomunomu haroro ni Jesus na hundul di halode i, i ma pahombangkon ulos/paheannasida, i ma mangalehon na ringkot di sangkap ni Jesus, alai lobi sian i na manalliki angka bulung rata sian ladang, huhut mangampparhon tu dalan i, jala manghihuthon halode i sian pudi huhur manjoujouhon ‘Hosianna, pinuji ma na ro marhitehite/di bagasan goar ni Tuhan i.
Pijuji ma harajaon ni amanta Daud na naeng ro. Hosianna ma di ginjang ni
ginjangan.” Sude nidok nasida on patolhason na Raja do ia Jesus i, jala laho
parohon sada harajaon naung sanga mago i do ia haroroNa.
Marhite angka pujian jinouhonnasida i tarida do ise Jesus i, jala parade ulaon sipatupaon ni Jesus, i ma parade haroro ni harajaon ni si David, I ma angka Dongan na masa mambahen manjadi ulaon pangaradeion ni Jesus Kristus laho masuk tu ulaon na mansai balga tu hajolmaon, i ma manaon di Jerusalem, i ma jolo nangkok tusi marhalode songon raja, ndang marhoda songon raja: Jesus i sandiri na manangkapisa, dua siseanna na unduk mangulahon tinonahon ni Jesus mangalap halode na ambat jonokkon ni harbangan ni sosor, huhut tahe na mambahen ulos di atas ni halode i sihundulon ni Jesus, sada halak na mangaloas halode i pangkeon ni Tuhan satongkin, sipaulahon dung sidung dipangke, jala natorop na mameakhon ulos nasida jala na manalliki bulung ni hau huhut mameakhonsa di jolo ni halode hinundulan ni Jesus, jala na mamuji-muji Jesus na hundul di atas ni halode i songon raja ni harajaon na naeng ro i.
Sian na lima na pinatupanasida be, na gabe jamita di hita di minggu on i ma na palimahon i, ulaon ni natorop na parade maremare huhut manoarahon pinuji ma na ro marhitehite/di bagasan goar ni Tuhan i. Saurdot do i tu pangantusion partondionta na ditiop HKBP, i ma dipadohot Debata Pargogo Nasohatudosan i do angka na tinompaNa pasauthon angka sangkapNa na uli, na badia, na paluahon angka na tinompaNa i sian dosa, mara nang hamatean, asa marhangoluon na tarpasupasu, gok dame, gok las ni roha, jala tau mangadopi angka tantangan jolma i.
Hamu angka dongan, dia do na nidok ni jamita on tu hita, tarlumobi tu hita naung tangkas umboto huhut manghaporseai na ia Jesus na naeng taingot panaononNa di minggu Passion di minggu na ro sahat tu haheheonNa?
Naparjolo, na boi tarimangrimangi i ma, ala ia sangkap hanangkok ni Jesus tu
Jerusalem i ma laho manaon sitaonon manobus dosanta, ingkon tuk do hita di
bagasan partondionta mamujimuji Jesus i naung gabe raja ni huria i, raja ni Huria Kristen Batak Protestan, na di bagasanna hita ganup marsaor. Tapujipuji ma goar ni Jesus Kristus Tuhan i, naung manobus hita. Ndang adong na pinangidoNa sian hita songon dalanta mandok mauliate ia so mamujimuji goarNa, asa satia hitabmarTuhanhon Ibana.
Na pinatupa ni sisean i, i ma na mameakhon ulosnasida diatas ni halode i, dohot na pinatupa ni natorop i, i ma mameakhon angka ulosnasida nang bulung ni hau manomunomu Jesus na hundul di atas halode i huhut mamujimuji Ibana boi do tabahen gabe sorminan mandok tu hita na patupa na denggan tu ulaon ni Jesus Kristus di huriaNa dohot mahite huriaNa di portibion ndang tuk holan parade angka sinadongan naung tajalo sian Tuhanta i, alai ingkon sahat do tu na mamujimuji Ibana songon Raja dohot Tuhanta na manobus hita sian dosa, jala na mambagabagahon hangoluan na manongtong di hita di ari parpudi, huhut na manarihon hita di ngolunta siganup ari uju tongon diportibion dope hita. Pamujion i ingkon tung tangkas do i di sandok ngolunta, ndang holan uju marminggu manang patupa partangiangan hita, alai dohot do marhite angka ulaonta.
Boasa mansai ringkot i di hita angka ruas ni HKBP di partingkian nuaeng?
Suraon do siala adong di tongatonganta na so apala marnida hinauli ni na binahen ni Jesus tu hita, gabe hira na so tolap hita, lam ma ringgas roha hita, mamujimuji goarNa na manaon humophop hita i? Suraon do nunga so apala manghilala be hita na tarjou do hita rap dohot Tuhanta i mangulahon misiNa na badia i palua hajolmaon sian dosa? Suraon do nunga gabe tung bahat sidalian na tapatubu di bagasan roha, pingkiran nang ateatenta, laho hinsa, ringgas, hobas, jala hiras mangulahon ulaon ni huria i di tongatonga ni portibion, i ma parsaoran, panindangion nang ulaon asi ni roha?
Di tongatonga ni HKBP, sihalashononta do na nunga tapahinsa ulaonta songon huria marhite padalan haputusan Sinode Godang pa-66-hon na mandok padalanonta ma Sentralisasi Parhepengon di sandok HKBP asa boi hita rap manuhuk na ringkot i di tongatonga ni huria, ndang be songon na sai laon ndang apala hibul dope rohanta patupa i?
Ala nunga tapadalan i mamungka 1 Januari 2023 i, suraon dope adong sian tongatonganta ruas nang partohonan ni HKBP na so haru manghalashon i huhut mamujimuji Debata, ai marhite sian i do hita boi humibul parsidohot di ulaon misi ni Jesus Kristus, ai nunga boi tahobasi huria na so apala tuk parhepengonna marhite na manongos partohonan tusi, jala nunga tabalanjoi angka partohonan i tigor, ndang be songon na sai laon, adong na so tuk balanjona, adong na tuk, adong huria na so marpartohonan, adong na lobi sian na na diharingkothon siala adong hatauon parhepengonnasida;
Nunga boi be hita manongos angka parbarita nauli tu duru ni HKBP na balanjona disarihon sandok HKBP; nunga lam tarida hasadaan ni tahi nang parhuriaonta di sandok HKBP panghorhon ni i; nunga lam tamba na boi taula dung martumbur sihumisikta di Sentralisasi Parhepengonta hinobasanta sude marhite Uluan na niurupan ni Badan Pengelola Sentralisasi Parhepengon, na mangula secara professional.
Mansai bahat na boi tapangke di ngolunta dohot di ngolu parhuriaonta laho
patupa dohot mangendehon pujian tu Tuhanta Jesus na manaek tu Jerusalem laho manaon sitaononNa humophon hita. Amen.
(Penulis saat ini melayani di Kantor Pusat HKBP Pearaja Tarutung Sumatera Utara)
