(Ephorus HKBP Pdt Dr Robin Butarbutar bersama Istri)
GREENBERITA.com- Hamu angka dongan sahaporseaon,
Manang piga taon dung manaek Jesus Kristus tu banua ginjang, migor tibu do angka na porsea di Ibana, tarlumobi angka siseanNa na ditonai Ibana asa borhat tu sandok portibion mamaritahon barita nauli taringot tu Ibana, manaringoti taringot tu hadirion ni Jesus Kristus i, ndang holan ari hatutubuNa dohot taringot tu ulaon ni Jesus nang panaononNa di hau pinorsilang sahat tu haheheonNa dohot pangajarionNa, alai dohot do taringot tu sangkap ni Debata mardomu tu hadirion nang ulaon ni Jesus Kristus.
Ala sian tongatonga ni bangso Jahudi, pomparan ni si Abraham, si Ishak dohot si Jakob do Jesus Kristus, ditangkasi nasida ma angka buku panurirang naung tarsurat di Padan Narobi, manulingkiti manang na adong angka panurirang ni Debata i na manurirangkon taringot tu hadirion dohot ulaon ni Jesus.
Ndang pola haduk rohanasida patupa panulingkition i, ai nang Jesus i sandiri - songon na tangkas andar di Evangelium Mateus - uju mangajari Ibana di tongatonga ni halak Jahudi di Palestina tarida do na lomo do rohaNa mamangke panurirangion ni angka panurirang uju mangajari Ibana tu angka natorop, songon na tangkas di jamitaNa di dolok.
Ndang pola leleng nasida migor marpos ni roha na nunga disurirangkon angka panurirang hape taringot tu hadirion dohot ulaon ni Jesus Kristus. Nunga dipapatar Debata hian hape sangkapNa di habuangan di Babel na paroonNa ma sahalak naposoNa patupa haluaon. Andigan tingkina ndang diboto nasida uju i, lam ma na dia halakna.
Nuaeng on tagoari ma i panurirangion na mesianis, i ma panurirangion na di bagasanna dipapatar sangkap ni Debata laho paro naposoNa gabe sipalua. Sada sian isi ni panurirangion mesianis i i ma na ginurithon ni panurirang *Jesaya di bindu 49:1-7* i, naung tajaha nangkin.
Marasing sian naung disurirangkon di bindu 12:1-6, i ma taringot tu tungkot ni si Isai, i ma na patuduhon sian pomparan ni ise ma na naeng ro i, jala songon dia hadirionna, i ma na digohi Tondi habisuhon, hapistaran, panuturion, dohot hagogoon ni Tondi, na manghalomohon hadaulaton maradophon Debata, jala ulaonna laho patindang uhum, di Jesaya 49:1-9 on ia na disurirangkon taringot tu hadirion ni Sipalua na naeng ro i taringot hadirion ni Sipalua i na digoari naposo ni Jahowa na ulaonna ndang holan laho mamboan mulak bangso ni Debata na di habuangan, mulak tu Israel, alai dohot do gabe panondang tu angka bangso parbegu.
Gariada gabe parhitean ni hatuaon ni Debata tu ujung ni tanoon: “...laho Paulakhon Jakob tu Ibana dohot papungupunguhon Israel, manogihon mulak angka pasipasi sian Israel” alai dohot do “gabe panondang di angka parbegu, gabe parhitean ni hatuaonHu ro di ujung ni tano on” (Jesaya 49:5-6).
Songon i ma hadirion ni naposona i, gabe panondang, na mambahen nang angka raja marnidasa ala na mamillit naposona i i ma Jahowa na bonar, na badia ni Israel (Jesaya 49: 7).
Digoari ma ulaon ni naposo ni Debata sinurirangkon ni panurirang Jesaya napaduahon i, i ma barita nauli tu bangso Juda - i ma na naeng boanon ni naposoNa i mulak tu Judea,- (Jaha: Haluaon ni bangsoNa), digoari pande bisuk ma on Haluan tu bangsoNa (mesianis particular, particular salvation) alai dohot do barita nauli di angka bangso na so Israel (dipangke hata Batak: bangso parbegu, alai di hata Heber goyim, i ma angka bangso na so Israel, na adong di tongatonga ni tano Israel, na di humaliangna na jonok dohot na dao pe tahe, i do umbahen didok ro di ujung ni tano on).
Barita nauli i ndang holan na gabe sinondang tu bangso Israel dohot na so Israel, goyim, alai umbagas sian na manondangi, alai gabe parhitean ni hatuaon (Heber: Yesuati = hatuaonku) ni Debata do ia naposoNa i, panondang i. Digoari angka pande bisuk ma on Haluaon na universal, mesianis universal.
Ala ni bidang ni siulaon ni naposo ni Debata i, i ma laho patupa haluaon na particular/holan tu bangsoNa - i ma maboan mulak nasida sian habuangan -, dohot haluaon na universal, - i ma marhite naposoNa i ma dapotan tua nang angka bangso di duru ni bangso Israel,- gabe adong ma ojahan na togu di angka siiuhuthon Jesus tarlumobi angka na porsea sian tongatonga ni na so Jahudi mamungka abad parjolo sahat tu nuaeng manjaha, mangalapati, dohot manghaporseai na ia na sinurirangkon ni Debata di Jesaya 49:1-7 i dumao, umbidang, tumimbo sian na boi antusan ni angka na tumangihon panurirangion ni si Jesaya i najolo dao andorang so ro Jesus Kristus. Panurirangion taringot tu Jesus Kristus do i, panondang ni portibion (Johannes 1: 4-5).
Hita angka ruas ni HKBP pe, na bahatan marharoroan sian halak/bangso Batak, nunga mangokku na ia Jesus Kristus i panondang ni portibion do. Jala Ibana do parhitean ni hatuaon ni Debata tu hita angka na porsea di Ibana.
Siala ni i do ia topik ni Jamitanta di minggu paduahon dung Epiphanias on na marojahan tu panurirangion ni si Jesaya na papatarhon sangkap ni Debata paro pembebas, siboan mulak pasipasi ni bangso Israel sian habuangan, alai dohot do gabe panondang dohot parhitean ni hatuaon ni Debata tu bangso na so Israel.
I do bagas ni na pinapatar ni Debata marhite Jesaya. Nunga tibu hape disangkapi Debata paro Panodang di hita, angka bangso na so Jahudi, parhitean ni hatuan ni Debata, tu hita nang bangso Batak.
I do sihamauliatehonta di parmingguonta sadarion: Debata naung tibu papatarhon sangkapna paro naposoNa, i ma Jesus Kristus i gabe sinondang di hita, alai dohot do gabe parhitean ni hatuaon ni Debata di hita. Mamungka 161 taon na salpu nunga disondangi Jesus Kristus i ngolu ni halak Batak, gabe ndang mian be di bagasan haholomon.
Nunga sahat tu hita halak Kristen Batak hatuaon ni Debata. Nunga angka naung dipalua Debata hita. Nunga angka na martua hita. Ingkon halashononta do i.
Alai dung tahamauliatehon jala tahalashon naung disondangi Jesus Kristus i hita, jala angka naung pinatuaNa, angka naung martua hita, denggan do tapangke tingki manangkasi manang naung lam tarsondangi Jesus Kristus do dirinta, roha pingkiran nang sangkapsangkapta, manang naung marpusat di Jesus Kristus do hita, naung marojahan tu angka hata niajarhonNa i ngolunta, parangenta, dohot angka sintasintanta, manang ndang dope, manang - baliksa - adong dope hita na so marpusat tu Jesus Kristus, ndang Kristo-sentris dope sihol ni rohanta, parangenta, ulaonta, sintasintanta, pambahenanta di ngolu on, maradophon angka na di tongatonga ni bagasta, maradophon angka na di humaliangta.
Ndang _kristo-sentris_ dope caranta marsaor dohot dongan, caranta mangula, caranta mandungdung sintasintanta.
Denggan ma hita mangarimangrimangi i.
Alai na parpudi, denggan do tong na, dung taida songon i uli ni sangkap ni Debata na patupa ndang holan haluaon partikularis na kontekstual - i ma mamboan mulak bangso na tarbuang, pasipasi ni Israel i tu Israel/Judea - alai dohot do nang di tingki mamingkiri haluaon ni bangsoNa sandiri Ibana, bangso na pinillitna, nunga dipapatar Ibana tahina parade naposoNa gabe panondang/sisondangi angka bangso, gabe parhitean hatuaon ni Debata tu angka bangso na adong di tongatonga ni bangso Israel uju di habuangan, nang na adong di inganan na asing, i ma ro di ujung ni tanoon.
I ma Debatanta i, Debata na so holan mamingkiri bangsoNa sandiri sinondangonNa, alai dohot do angka bangso naasing, goyim. Debata na songon i do Ibana, hamu angka dongan.
Ala ni i do mamungka sian partingkian ni Jesus, na diuduti angka apostel tarlumobi apostel Paulus, dung i angka parbarita nauli di portibion, sai ditahi, diula, diuduti angka sisean manang siihuthon Jesus do mamaritahon barita nauli taringot tu naposo ni Debata i, i ma Jesus Kristus Sipalua i, panodang ni portibion i, parhitean ni hatauon ni Debata i marhite panghophopNa di hau pinorsilang i, jala marhite na hehe Ibana sian hamatean songon buhabaju ni angka na naeng hehe muse tu hangoluan na manongtong i, tu angka bangso na so disondangi Ibana dope.
I do umbahen na torus mardalan ulaon mamaritahon barita nauli, ndang holan laho patiurhon ngolungolunta naung sinodanganNa dohot pinaluaNa i, alai dohot do asa dohot tong disondangi Jesus Kristus i angka bangso na asing.
Mansai ampit do jamita on tu HKBP na mamungka 1 Januari 2023 i nunga padalanhon Sentralisasi Parhepengon, pamusatan pengelolaan parhepengon ni HKBP, asa boi sude angka naung tardidi tu bagasan goar ni Debata Sitolusada i, sude angka naung manjanghon sondang na ro tu portibion i torus dihobasi angka parbarita nauli na ulaonna mamaritahon barita na uli taringot tu pandondang i di sude ingangan di dia adong pungu jala marsaor angka ruas ni HKBP, asa ris panghobasion tu nasida sude, di dia pe ruas ni HKBP i maringan.
Alai laos marhite Sentralisasi Parhepengon i do tong dipatuk Debata marhite angka pelean ni ruas ni HKBP ulaonta mamaritahon barita nauli taringot tu panondang dohot parhitean ni hatuaon ni Debata i tu angka bangso/houm nang marga na so dung dope umbege, na so dung dope manangihon panorangion taringot tu Jesus Kristus panondang i, jala na so umboto, mandai dohot manghalashon Jesus na gabe parhitean hatuaon ni Debata i.
Nunga adong 33 halak angka naung diparade HKBP marhite angka pelatihan dohot praktek gabe misionaris ni HKBP sian angka naung marsikkola di bidang teologi, di bidang haguruon, dohot di bidang parjamita Ina nang di hadiakoneson.
Nuaeng tongong mandalani latihan taon parjolo nasida. Di ujung ni taon 2024 manjalo tohonan missionaris ma nasida. Udutonta dope mangaririt nasai godangnari di bagasan taon on. Sian Sentralisasi Parhepengon i ma patoguonta ulaon ni angka evangelis na mangula dope sahat tu nuaeng di kepulauan Rupat dohot di Enggano.
Alai marhite i do tong boi tongosonta parbarita nauli tu angka kota-kota pusat pendidikan ni bangsonta di Indonesia on. Sian i ma tong tapatogu ulaonta manongos angka parbarita nauli tu marragam konteks ni ngolungolu asing ni di tongatonga ni angka hurianta, isara tu angka dakdanak jalanan.
Marragam konteks ni ngolungolu ni hajolmaon na boi gabe ingananta mamaritahon barita nauli i.
Ala ni i, manimpuli, denggan ma tahamauliatehon naung parsidohot hita gabe hasahatan ni ulaon ni naposo ni Debata i, i ma Jesus Kristus panondang ni portibion i. Bahat do angka parbarita nauli naung jinou, pinarade jala tinongos ni Debata tu hita mamungka abad pa-19-hon i sahat tu nuaeng, na so sian duru ni Indonesia on nang na ro sian ruas ni HKBP.
Alai denggan ma tong tapasungkunhon tu dirinta be manang naung denggan saor panondang i dohot angka ajar ni panondang i di bagasan ngolu nang ulaonta siganup ari. Dung pe tapatupa duansa, hamauliateon dohot pamilangmilangion asa tarbahen hita pangkeon ni Debata gabe parbarita nauli taringot tu panondang i asa dohot nang angka bangso na so manandasa dope mananda Ibana jala dapotan hatuaon ni Debata,
Amen..
*( _Penulis saat ini melayani di Pearaja Tarutung sebagai Ephorus HKBP_ )*
