Oleh Pdt. Dr. Robinson Butarbutar
GREENBERITA.com- Hamuna angka Dongan sahaporseaon, Di minggu Adven Paduahon on ditogihon Debata roha, ateate, pingkiran nang sandok ngolunta tu partingkian ari ni Kristus, tu masa depan, i ma tu ari haroroNa paduahalihon, ari panguhuman sinangkapan ni Debata, ari las ni roha dohot ari hamuliaon dohot ari hamonangan, ari haluaon na manongtong di angka na manghaporseai, manjalo, dohot mangihuthon Kristus saleleng ngoluna di ngolu na so manongtong di portibion i.
Dibagabagahon Debata do, tahaporseai jala tapaima do Ari ni Kristus i nang dung marujung ngolunta di portibion.
Tusi do hita tarjou umbahen saor tu hita barita nauli taringot tu jala di bagasan Jesus Kristus Tuhan i, umbahen dibasabasahon tu hita haporseaon di diri, ulaon nang bagabaga ni Tuhanta Jesus i na paluahon hita sian dosa, dohot sian hamatean na manongtong i, jala na marbagabaga mangaramoti hita sahat ro di ari parpudi.
Molo tung pe di tingki mamungka abad parjolo sahat tu tingkinta sadarion nang di ariari na ro ndang ro dope ari ni Kristus i, ingkon marpaima dope hita angka na porsea i, na so jadi hita ganggu taringot tusi.
Ai “Naung umpungka ulaon na denggan i di bagasan hita, patuluson ni I do i sahat ro di ari ni Kristus" (Pilippi 1: 6).
I do haporseaon ni hita angka siihuthon Ibana. I do na dipatolhas, dihaporseai jala ditangiangkon apostel Paulus di parsitongaan ni abad parjolo tu halak Kristen na adong di kota Pilippi (Pilippi 1: 4-6).
Nuaeng, na gabe sungkunsungkun tu hita i ma dia ma na tarbahen hita asa di bagasan habadiaon, hapolinan hita andorang so ari ni Kristus i, tarlumobi ala jolma na marpamatang do hita, i ma na mura madabu tu bagasan dosa molo so jamot hita, jala di portibion dope hita mangolu.
Sungkunsungkun i dialusi apostel Paulus jala ditangiangkon. Songon dia ma asa tarbahen hita marhabadiaon hita manomunomu ari ni Kristus i.
Di hata Gorik dipangke hata on na talapati dohot polin so partuktuhan: eilikrineis dohot aprospkopi. Di hata Inggris: pure and blameless.
Mansai ringkot do taalusi sungkunsungkun on sian pamerengon (Jaha: perspektif) Hakristenon na binaritahon ni apostel Paulus na, dung mardalan sampulu dua abad mamungka abad paopathon, dipaimbaru di abad pasampulu onomhon jala ditariashon angka huria Protestan mamungka sian i sahat tu tingki on saurdot tu isi ni pamaritaan ni barita nauli pinatolhas, dohot pinartahanhon ni apostel Paulus i songon na ginurithonna di angka suratna di Padan na Imbaru tarlumobi di surat Rom, Galatia, 1-2 Korintus, dohot Pilippi tarlumobi.
Ndang sian pamerengon ni Ugamo Jahudi manang pamerengon ugamo na asing pe. Dia do huroha pamerengon manang pangantusion Ugamo Hajahudion na so saurdot tu na binaritahon, hinaposan dohot niajarhon huhut diparangehon apostel Paulus i?
I ma na mandok marhite na mangulahon uhum/angka patik asa tigor/polin/badia. Ndang tarbahen hita patigoron ni Debata marhite na mangulahon patik.
Ndang tarbahen hita mian di bagasan habadiaon marhite na mangulahon angka patik, marhite hadaulatonta sandiri. Alai songon dia do? Di na tapamanat isi ni Pilippi 1: 5-10 i, adong tolu na ditangiangkon apostel i naung masa di ngolu ni halak Kristen di Pilippi i, na ingkon tahaposi patupaon ni Jesus Kristus di tongatonganta, jala na ingkon masa di ariari na ro di tongatonga ni ngolunta, na boi tong tarimangi songon tona ni Tuhanta di hita di minggu Adven paduahon on.
Natolu i ma na dipatorang jala ditangiangkon apostel Paulus pamasaon/patupaon ni naporsea di Pilippi asa polin, so partuktuhan nasida di ngolu on manomunomu ari ni Kristus i:
Naparjolo , marsaor di ulaon mamaritahon barita nauli. Dipangke hata on na talapati dohot hata marsaor: koinonia. Di hata Inggris dilapati do tong hata koinonia di ulaon marbarita nauli i dohot lapatan on: partnership. Parsidohot do huria na di Pilippi mamaritahon barita nauli marhite na marsaor/bermitra/berpartner dohot apostel i mamungka dung gabe porsea nasida di Jesus Kristus i.
Tarida do i marhite panumpahion di angka na ringkot di ulaon mamaritahon barita nauli tu angka bangso niuluhon ni apostel i, di personel i ma si Epaproditus dohot Eudia nang Sintike, Klemen nang angka na asing (Pilippi 4: 2-3) dohot di sinadongan (Pilippi 4:16-20).
Ndang holan manjalo barita nauli i, alai parsidohot di ulaon mamaritahon barita nauli, i do sada hataridaan ni na manjagai dirinta sian ngolu na so polin/na so gabe partuktuhan. Ai di na parsidohot di ulaon mamaritahon barita nauli, jagaonta ma dirinta unang gabe partuktuhon.
Napaduahon, haporseaon na togu na patuluson ni naumpungka ulaon na denggan di tongatonganta ruas nang partohonan ni Hakristenon parsidohot hita ruas dohot partohonan ni Huria Kristen Batak Protestan do ulaonNa mamungka abad pa-19-hon sahat tu nuaeng, i ma Kristus Jesus i (Pilippi 1: 6).
Nunga dipatupa Ibana ulaonNa paluahon hita sian haholomon, sian hamatean, sian dosa, sian hatartadingon, sian hamagoan. Nunga dipatupa Ibana manghaholongi hita, pola dipelehon Ibana ngoluNa humophop hita.
Marhite pandidionta nunga gabe ruas ni harajaonNa hita. Nunga gabe bagian ni angka na badia hita. Nunga nampunaNa hita. Ibana gabe Debatanta. Gabe bangsoNa hita halak Kristen Batak.
Alai patoluhon, ulaon ni Jesus Kristus na patulushon ulaonNa di tongatonganta i ingkon do taalusi dohot alus na manghamauliatehon i. I ma asa angka na marholong ni roha hita. I ma angka na lam marhasurungon holong ni rohanta: “Naeng ma lam sumurung holong ni rohamuna, marurat di parbinotoan dohot di nasa pangimbangion partondion laho manangkasi na rumingkot I” (Indonesia: Kasihmu makin melimpah dalam pengetahuan yang benar dan dalam segala macam pengetian, Pil 1: 9-10).
Dipangke apostel Paulus do hata na mangihut on taringot tu marholong ni roha na sumurung i: eti mallon kai mallon. Di hata Inggris dilapati hata on dohot na mangihut on: abound more and more. Holong ni rohanta i abound, berlimpah, marlobilobi. Marhite na manangkup hinangkam ni hata eti mallon kai mallon manang abound more and more, boi ma talapati umbagas hata na dipangke di Bibelta i, sumurung, na boi talapati dumenggan tu pangantusian lobi sian sumurung.
Ndang holan kualitas alai dohot do kuantitas nihangkam ni hata eti mallon kai mallon i. Ndang humurang ulaon holong i dipatupa angka na manomunomu di ari ni Kristus i. Alai ndang asal kualitas dohot kuantitas boti sambing ia na tinangiangkon ni apostel Paulus sipatuduhonon ni angka na porsea i songon rumang ni na manomunomu ari ni Kristus i asa tardapot polin dohot ndang partuktuhan, alai dilapati do umbagas, i ma na mangihut on: holongta na marlobilobi i ndang asal boti, alai marurat di parbinotoan dohot nasa panimbangion.
Di hata Indonesia dilapati do hata Gorik perisseue en epignosei kai pasei aisthesei dohot dalam pengetahuan yang benar (Gorik: epignosei) dan dalam segala macam pengertian (Gorik: aisthesei). Di hata Batak: marurat di parbinotoan dohot panimbangion partondion.
Ndang apala adong nian dipangke hata partondion. Alai dilapati songon i laho patorangkon na so holan pengetahuan yang benar alai dohot do pamilangon/pamilangmilangon na jamot, di hata Inggris didok discernment, na di bagasanna adong pamarungkilhonon.
Asa, marhangoluan na marholong na sumurung/marlobilobi di kualitas nang kuantitas i ndang asal boti alai dipatupa mangihuthon parbinotoan na sintong dohot pamilangmilangion na umbagas/na diparungkilhon di tondi. Asa, ndang maralo holong i tu parbinatoan na sintong dohot naung mamolus pamilangmilangon na padohothon pamarungkilhonon partondion/hajamoton. Dapot roha do boasa i diondolhon dohot ditangiangkon apostel i patupaon ni angka na porsea i di na manomunomu ari ni Jesus Kristus i, unang gabe songon holong na sumurung na di ujungna ndang holong i be, alai nunga maralo tusi, sipatupaon ni halak Kristen.
Asa, natolu i, parsidohot di ulaon pamaritaan di barita nauli ni Jesus Kristus, haporseaon di na patuluson ni Tuhanta Jesus, jala parpudi mangolu di bagasan holong na marlobilobi jala na marurat/marojahan/mian di bagasn hasintongan dohot pamilangon na bagas, i do dipangido tu hita angka ruas ni HKBP di minggu II-hon Adven on.
Ala ni i, tatimbangi be ma dirinta be taringot tu na tolu i. Parjolo, songon hatariadaan ni naung taruli hita/ahu/ho di barita nauli naung sahat tu hita binahen ni parbarita nauli tu hita, beha do parsidohotonta di ulaon marbarita nauli i nasai laon? Holan na manjangkon pasupasu barita nauli na sahat tu hita i do hita, alai ndang parsidohot hita di ulaon mamaritahon barita nauli i, manang marhite dalan na binahen ni halak Kristen na di Pilippi, i ma manongos ruasnasida rap mamaritahon barita nauli tu na so porsea dope, dohot manarihon na ringkot di ulaon mamaritahon barita nauli i? Molo ndang dope, denggan ma hita muba.
Paduahon, porsea do/dope hita na patuluson ni Jesus Kristus i do ulaonNa di tongatonganta sahat tu ari ni Kristus i?
HagogoonNa, hasatianNa, dohot pandonganionNa di hita: Porsea dope hita na Ibana do patulus ulaonNa di dirim, di bagasmu, di sektormu, di ulaonmu, di Pospelmu, di huriam, di resortmuna, di distrikmuna, di sandok HKBP? Manang dia pe ulaon naung, na tongon, dohot na naeng diula Jesus Kristus di tongatongamuna marsasahalak dohot marsasahuria, songon di nang di tongatonga ni luatta, bangsonta, dohot portibion?
Tahalshon ma barita nauli i: Patuluson ni Jesus Kristus do ulaonna di ngolunta nang di tongatonganta. Marhagogoon do Ibana patupa i.
Patoluhon, beha do ngolum taringot tu na marhaholongon na sumurung/na marlobi/na berlimpah, na abound, di kuantitas dohot di kualitas? Ndang jadi hita mambahen suhatsuhat ni on holan di materi, nang hepeng, alai ingkon dohot do tu rumang na asing tu angka donganta jolma nang tu angka donganta na tinompa ni Debata, di rohanta, di bagasta, di parsaoranta, di ulaonta marsadasada.
Dipargogoi Debata ma hita manangiangkon dohot patupahon tolunsa, songon rumang ni panomunomuanta di ari ni Kristus Jesus i. Amen.
( Penulis saat ini melayani sebagai Ephorus HKBP di kantor pusat Pearaja, Tarutung )
