 |
| Oleh Pdt. Dr. Robinson Butarbutar, Ketua Rapat Pendeta HKBP |
“Ditanda Tuhan i do ho” (Johannes 1: 43-51).
Hamuna angka Dongan hinaholongan di bagasan Kristus Jesus.
Di parsaoranta dohot Debata Umboto saluhut, sada na patupa songon sisomba Ibana, i ma mananda Debata: Ise Ibana, dia ulaonNa di portibion, dia pinatupaNa di ngolunta angka tinompaNa i, songon dia Ibana mangula uju mangolu dope hita jala dung marujung ngolunta. Lam tamba ari lam tatanda Ibana. Ai lam tatanda Debata, lam taboto ma songon dia mangoloi nidokNa. Lam taboto ma denggan manomba Ibana. Lam taboto do pasahat pangidoanta tu Ibana.Di angka evangelium na-4 i diondolhon do hinaringkot ni na mananda ise Jesus Kristus Tuhanta i. Sai diigil Jesus do sian angka siseanNa asa ditanda nasida ise Ibana. Jala di Johannes 1: 1-42 i nunga dipatuduhon ise Jesus, i ma Hata i, na tumompa nasa na adong andorang so gabe jolma Ibana. Jala mangihuthon panurirang Johannes Pandidi ia Jesus i Birubiru ni Debata do na manesa dosa ni portibion.
Alai sadanari, songon na niondolhon ni Evangelium Joh 1: 43-51 on, i ma Ditanda Jesus Kristus Tuhan i do hita, hamu, ahu, ho, si Nathanael nang andorang so dijou ibana gabe sisean ni Jesus. Dirimpu si Nathanael par Bethsaida do na holan sahalak pangisi ni Nasareth sambing ia Jesus i, sada huta na uju i ndang apala sihalashonon mangihuthon si Nathanael, umbahen ndang dianturehon ibana panindangion ni donganna sahuta si Philipus na mandok na so holan i hadirion ni Jesus, alai sahalak naung disurirangkon si Musa di surat Patik dohot na pinaboa ni angka panurirang ia Jesus. Hape, di na paadop bohi Ibana dohot Jesus jala manghatai dohot Jesus diboto si Nathanael ma na lobi sian na tinandaNa ia Jesus i, i ma sahalak na umboto panggulmiton ni ngolu ni si Nathanael do Ibana. “Huida do ho uju di toru ni hau ara i ho, andorang so dijou si Pilipus i dope ho” (Joh 1: 48). Dung i pe asa dihatindangkon si Nathanael na Anak ni Debata jala raja ni halak Israel do ia Jesus i. Nang so di toru ni hau ara i si Nathanael, boi diida Jesus si Nathanael: Di dia ibana jala di ana tongon diula ibana.
Ala ni i do umbahen na ndang apala topik on na naeng riming-rimangonta di jamita sadarion, “Hutanda do Ho ale Tuhan, i ma Anak ni Debata, Anak ni jolma i, Sipalua, Parasiroha, dohot na asing na i…”, alai “Ditanda Tuhan i do ho.”
Di sejarah ni angka penelitian taringot tu Jesus i, bahat situtu do tingki dipangke laho mananda ise Jesus na sian Nasareth i. Gabe hira siparesoon Jesus i, onjek penelitian. Alai na jotjot dihalupahon di penelitian taringot tui se Jesus i, i ma na Ditanda Tuhan i, Jesus Kristus, do ganup hita. Songon na tangkas tarida di parjumpangan ni si Nathanael dohot Jesus, ndang holan halak Nasareth sambing hape ia Jesus i, alai lobi sian i, i ma na umboto ganup pargulmiton ni ngolunta do. I do na taida tong di parjumpangan ni Jesus dohot sahalak parompuan Samaria di topi ni sumur ni si Jakob di Sichar i (Joh 4): “Nunga lima hali parompuan Samaria i muli, jala mangolu rap dohot bao ana so sinondukna do ibana uju i” (ay 18). Dung songon i hata ni Jesus tu ibana gabe porsea jala dihatahon ibana tu donganna sahuta na Mesias i do Jesus. Asa, ndang siparesoon Jesus i nang hataNa. Alai baliksa do, hita do siparesoonNa dohot siparesoon ni hataNa. Ingkon hita do diuba hataNa. Siala ni i do umbahen ingkon sahat do pamaresoon di hataNa tu na hita di pareso hataNa angka na manjaha hataNa.
Boasa ma parbinotoan na “Ditanda Jesus do ho, ahu, hita” sirimangrimangonta di partingkianta sinuaeng on?
(1) Suraon do na ala tadok na dos songon hita ia Jesus i, jolma. par-Nasareth, songon hita par-huta on, par-kota on, par-Profesi on, par-profesi an, sian partani sahat tu parnampuna usaha na mansai balga, hape ditanda Jesus Tuhan i do hita, sude pargulmiton ni ngolunta, gabe ndang tasomba Ibana songon Debata na mananda ganup hita, gabe ndang porsea hita tu Ibana songon Tuhan, ndang tajangkon Ibana, ndang tahaporseai hataNa, ndang porsea hita di Jesus, ndang tasomba Ibana ganup ari, ndang tu Ibana hita mangalualu, ndang tajou goarNa uju taadopi hagogotan, uju marungkil hita, uju taadopi sitaonon?
(2) Suraon do siala tarimpu saleleng on na terbatas partinandaanNa taringot tu dirinta, umbahen olo hita mangasangi sama donganta siala nunga dumenggan ngolunta sian ngolunasida, mamora hita, manang baliksa sai tasalahon na asing ala pogos hita, hape hita do na so ringgas jala marbisuk mulaulaon, dohot mamangke mansai denggan angka na pinalumehon ni Debata tu hita?
(3) Suraon do siala tarimpu saleleng on na so diboto Tuhanta Jesus angka na taula di ngolunta di tingki na salpu dohot di tingkion umbahen taulahon na so tama ulaonta, atik pe targoar siseanNa hita, angka ruas ni HKBP naung tibonus ni Tuhanta, angka pangula ni huriaNa, ala tarimpu ndang diboto Ibana na taula suhar ni na hinalomohonNa, ala didok rohanta ndang adong na marnida i, asal ma ndang diboto angka donganta jolma dohot angka sipajongjong uhum?Tadok siseanNa hita, hape ndang taula angka na ingkon siulaon ni siseanNa. Baliksa gabe ndang serep hita songon angka na tinobusNa, na so adong sipaburnangburnangonta?
(4) Suraon do ala nunga tung hagogoonta sandiri tapangasahon laho mananda Ibana, hape , tumandaan do Ibana taringot tu ise hita, sian na hita na mananda Ibana, gabe horang pos ni rohanta tu Ibana na rap dohot hita mangadopi angka na ingkon siadopanta di ngolu on?
Sada do na tinuju ni panurat evangelium Johannes uju manurathon evangeliumna i di ujung ni abad parjolo, di partingkian uju ndang bahat dope na umbege barita nauli taringot tu Jesus, i ma asa porsea na manjahasa na Jesus i do Sipalua, jala dapotan hangoluan na saleleng ni lelengna na manghaporseai Ibana (Joh 20: 31). Sada sibonsiri umbahen tama tahaporseai Ibana i ma ala ditanda Ibana do hita, ise hita, songon dia pargulmiton ni ngolunta, dia na tongon taadopi. Ala dapotan hangoluan na manongtong do na manghaporseai na Mesias i do Ibana, ba lam ma na taharingkothon di ngolu on nang di partingkian Covid 19 on, di na ringkot di hita patupa angka sipatupaon mangondihon dirinta sian Covid 19 marhite 5 M, dohot marhite angka dalanNa na so tarsura hita, songon i nang di na ingkon muba hita mangolu dohot marusaha nuaeng on, ndang be songon na somal di tingki na salpu, alai marhite hasomalan na imbaru di partingkian internetisasi on, mamungka sian parsingkolaan ni angka ianakonta nang di angka usaha-usahanta.
Molo ndang adong manang gumale do haporseaonta saleleng on di Jesus na mananda hita, tapangido ma tu Tuhanta asa dipatogu Ibana haporseaonta na ditanda Ibana do hita, nang angka na ringkot di hita, asa martua hita uju di ngolu on nang dung marujung ngolunta di portibion. Amen
