“Huaso ni Haheheon ni Jesus” (Mateus 28: 1-10)
GREENBERITA.com- Selamat Paskah ma di hamu saluhutna, angka
Dongan. Barita na mansai uli siauhononta di pestanta
sadarion i ma pinasahat ni surusuruan ni Debata tu si Maria Magdalena dohot si
Maria na sadanari : “Ai nunga dipahehe Ibana sian angka na mate.” Huaso ni
Debata na sun timbul i do na pahehe Jesus i. Na opat na mangihuthon on ma
tarsurat di Mateus 28: 1-10 patudu huaso ni Debata di haheheon ni Jesus Tuhanta
i.
Parjolo, masa lalo na balga (Gorik: Seismos
megas) andorang so dipahehe Debata Jesus sian angka na mate. Diiida jla
dipanghilalahon duansa parompuan i, dohot parjaga udean sinuru ni parhuaso Rom
i do i.
Paduahon, ro surusuruan ni Debata, rupana songon hilap
idaon, ulosna saksak songon hapur, manggulang batu udean ni Jesus jala hundul
di atasna, laos mangido duansa parompuan i, ndang holan marnida hapeahan ni
Jesus hian di udeanna i, alai dohot do manuru nasida mamaritahon Jesus naung
pinahehe ni Debata i tu 12 sisean ni Jesus naung sanga mulak be tu hutanasida
di Galilea uju tarsilang Jesus.
Patoluhon, rade jala tuk gogo ni duansa
parompuan i borhat mardalan pat tu Galilea mangoloi panuruan ni surusuruan i, tung
pe 126, 98 kilometer dao ni sidalanonnasida.
Paopathon, ro Jesus naung pinahehe ni Debata i mandapothon nasida,
mangaloas manghaol patNa, manungkap manomba Ibana, dohot palumehon dame tu
nasida.
Ala ni i, angka dongan, sadarion mansai ringkot lam tapatogu haporseaonta di hagogoon ni
Debata di ngolunta. I do naung pahehe Jesus sian hamateanNa. I do na naeng
pahehe hita sian hamateanta muse.
I do na patau hita mandundung sidungdungonta
patupa na denggan di ngolunta, nang mangalo hajahaton. I do na mamargogoihon
hita mangadopi marragam parungkilon ni ngolunta saleleng on, nuaeng, nang sogot
pe, na so apala dumokdok sian hamatean i sandiri.
I do tong na ringkot tahaporseai nang di
tingki on, di na martongtang bangsonta pasohothon harararat ni Virus Covid 19 i, na pola mampanghorhon tu hinamaol ni ngolungolu ekonominta tarlumobi angka
naumpogos di tongatonganta.
HuasoNa i do tong na mangalehon gogo tu
hita manguduti usahanta nunut jala radot manjaga jarak fisik sosial, mangaradoti
hahipasonta, mangubati angka naung sinonggopan ni virus i, mangalo virus i di
pamatangta, dohot mangurupi angka na gabe maol situtu ngolungoluna panghorhon
ni virus on.
HuasoNa i do na patau hita jolma patupa vaksin alo ni virus on.
Nunga dipahehe Debata Jesus sian hamateanNa marhite huasoNa. Paheheon ni huasoNa
i do tong hita mangalo angka siadopanta di ngolu on, tung songon dia pe boratna.
Asa - songon si Maria Magdalena dohot si Maria na sadanari, na dipatuk mardalan
pat mandalani dalan na mansai dao mamboan barita nauli tu Galilea– patauonNa do
tong hita patureture ngolunta di tingki on nang di ariari na naeng ro.
PatauonNa
do tong bangsonta mamolus jala ruar sian partingkian na mansai maol nuaeng on,
jala dung i manguduti pembangunan ni bangsonta gabe bangso na maju, na
bermartabat, na tigor, na mardohar jala gok dame.
Sai digohi huaso ni Debata na pahehe Jesus
sian hamatean i ma hita di ariari na naeng ro on. PatauonNa huriaNa nang hita
angka na porsea mangadopi partingkian on.
Beta manghaporseai, mangido, marsaulihon,
dohot manghangoluhon huaso ni Debata na pahehe Jesus sian hamatean i di ariari
na naeng ro. Rade jala buas do Ibana palumehonsa tu hita. Haleluya. Selamat
Paskah ma di hita saluhutna. Amen.
(Sian Parsameanta, STT-HKBP Pematangsiantar, Pdt Dr Robinson Butarbutar, 0812-62472015)
(Sian Parsameanta, STT-HKBP Pematangsiantar, Pdt Dr Robinson Butarbutar, 0812-62472015)
